Қарағанды облысында жаңа кәсіпорынға 1,5 млрд теңгеден астам инвестиция салынды. Зауыт жобалық қуатына шыққан кезде 40 тұрақты жұмыс орны ашылады.

Қарағанды облысының Осакаров ауданында «Алтын Алқап Қарағанды» ЖШС-нің кірпіш зауыты іске қосылды. Кәсіпорын Қазақстан мен Қытай арасындағы ынтымақтастық аясында жүзеге асырылған инвестициялық жоба болды.

Жобаға 1,5 млрд теңгеден астам инвестиция тартылды. Зауыттың өндірістік қуаты жылына 45 млн кірпіш шығаруға есептелген. Кәсіпорында сазды дайындаудан бастап дайын өнімді күйдіруге дейінгі толық өндірістік цикл жолға қойылған. Бір өндірістік партия барлық кезеңнен шамамен сегіз сағатта өтеді.

Өндірісті жергілікті шикізатпен қамтамасыз ету үшін инвесторға саз кен орнын игеруге арналған жер учаскесі берілді. Сонымен қатар зауыттың жұмысына қажетті инженерлік инфрақұрылым салынды.

Қарағанды облысының кәсіпкерлік және өнеркәсіп басқармасының басшысы Асқар Ғазалиевтің айтуынша, жобаға мемлекет тарапынан кешенді қолдау көрсетілген.

Жобаға мемлекет тарапынан кешенді қолдау көрсетілді. Кәсіпорынды қажетті инфрақұрылыммен қамтамасыз ету мақсатында Қарағанды облысының әкімдігі бюджет қаражаты есебінен сыртқы электрмен жабдықтау желілерінің құрылысын қаржыландырды, — деді ол.

Қазіргі уақытта кәсіпорында 20 адам жұмыс істейді. Зауыт жобалық қуатына шыққаннан кейін жұмыс орындарының саны 40-қа дейін көбейеді.

Осакаров ауданының әкімі Руслан Нұрмұханбетов жаңа өндірістің аудан тұрғындары үшін де маңызы зор екенін атап өтті.

 Аудан тұрғындары үшін бұл — жаңа жұмысқа орналасуға, кәсіби тұрғыдан өсуге және заманауи өндірістік технологияларды меңгеруге мүмкіндік, — деді әкім.

Инвестор Сай Шуан Гун кәсіпорынның орналасқан жері өнімді Қарағанды және Ақмола облыстарының нарықтарына жеткізуге мүмкіндік беретінін айтты.

 Қолайлы логистиканың арқасында біздің өнім екі өңірдің қажеттілігін бірден өтеуге мүмкіндік береді. Біз құрылыс компанияларымен ұзақ мерзімді ынтымақтастық орнатуға, сапалы өнімді тұрақты шығаруға және өндірісті одан әрі дамытуға ниеттіміз, — деді ол.

Кәсіпорын өнімінің алғашқы үлгілері әлеуетті сатып алушылар тарапынан оң бағаланған. Құрылыс компаниясының өкілі Ислам Тасуев кірпіштің геометриясы мен тығыздығына назар аударды.

Жаңа зауыт отандық құрылыс материалдарын өндіру көлемін арттыруға, жаңа жұмыс орындарын құруға және жергілікті бюджет түсімдерін көбейтуге мүмкіндік береді.