2026 жылдың басынан бері Halyk Bank Қазақстан бойынша қайырымдылық және қоғамдық маңызы бар жобаларға 4,3 млрд теңгеден астам қаражат бөлді. Қаржы білім беру, спорт, мәдениет, экология салаларын дамытуға, сондай-ақ әлеуметтік осал топтарды қолдауға бағытталды.

Банктің негізгі әлеуметтік бағыттарының бірі – биыл 10 жылдық мерейтойын атап өткен «Халық» қайырымдылық қорымен серіктестік. Тек биылғы алғашқы жартыжылдықтың өзінде банк қордың әлеуметтік жобаларын жүзеге асыруға 2 млрд теңге бөлді.

Ірі жобалардың қатарында 9 миллион ағаш отырғызуды көздейтін Halyk Орманы бастамасы, Жаңаөзен қаласында дене шынықтыру-сауықтыру кешенінің құрылысы, студенттік киберспортты дамыту, AUYL SPORT 2026 жобасының үшінші маусымы, SOS Балалар ауылдары Қазақстан ұйымын қолдау, Алматыдағы әлеуметтік осал отбасылардың үйлерін газдандыру, сондай-ақ Абай атындағы Қазақ ұлттық опера және балет театрының және өзге де мәдени бастамалардың жобалары бар.

Он жыл ішінде «Халық» қоры жалпы құны 100 млрд теңгені құрайтын 200-ден астам әлеуметтік жобаны жүзеге асырды.

Банк үшін тағы бір маңызды бағыт – 2010 жылдан бері жалғасып келе жатқан «Аяла» қайырымдылық қорымен ынтымақтастық. Осы уақыт ішінде Halyk мемлекеттік перинаталдық орталықтар мен перзентханаларды заманауи медициналық құрал-жабдықтармен қамтамасыз етуге шамамен 850 млн теңге бағыттап, мыңдаған сәбидің өмірін сақтап қалуға үлес қосты.

Банк өкілдерінің айтуынша, қайырымдылық Halyk-тің ұзақмерзімді тұрақты даму стратегиясының ажырамас бөлігі болып табылады. Оның мақсаты – тек бүгінгі мәселелерді шешу ғана емес, қоғам үшін ұзақ мерзімді оң өзгерістерге негіз қалау.