2026 жылғы 20–21 қазанда Алматыда Халықаралық қорғау мәселелері жөніндегі өңірлік оқыту бағдарламасы (IPLP) өтті. Оған Қазақстан, Қырғызстан, Өзбекстан, Тәжікстан және Түрікменстан мамандары қатысты.

Іс-шараны БҰҰ Босқындар істері жөніндегі Жоғарғы комиссары басқармасының (БҰҰ БЖКБ) Орталық Азиядағы Өкілдігі Қазақстан Республикасы Еңбек және халықты әлеуметтік қорғау министрлігінің Көші-қон комитетімен бірлесіп ұйымдастырды. Бағдарлама Алматы процесі аясында өтіп, халықаралық қорғау саласындағы тәжірибе алмасуға және практикалық тәсілдерді жетілдіруге бағытталды.

Оқытуға мемлекеттік органдардың, сот жүйесінің, құқық қорғау, шекара және көші-қон ведомстволарының өкілдері қатысты.

Бағдарлама барысында босқындарды қорғаудың халықаралық стандарттарына және кері қайтармау қағидатын сақтауға ерекше назар аударылды. Сондай-ақ гуманитарлық міндеттемелерді орындау мен ұлттық қауіпсіздік талаптарының арасындағы тепе-теңдікті қамтамасыз ету мәселелері қарастырылды.

Халықаралық сарапшылардың жетекшілігімен қатысушылар баспана беру, экстрадициялау рәсімдері және ведомствоаралық өзара іс-қимылдың практикалық аспектілерін талқылады. Нақты жағдайлар негізінде халықаралық құқық нормалары мен ұлттық заңнама талаптарын ескере отырып шешім қабылдау тәсілдері қарастырылды.

Оқыту бағдарламасы көші-қон және халықаралық қорғау мәселелерімен тікелей айналысатын мамандардың кәсіби құзыреттерін нығайтуға бағытталды. Алынған білім мен практикалық ұсынымдар бейінді мемлекеттік органдар жұмысының тиімділігін арттыруға ықпал етеді.

Мұндай оқыту іс-шаралары тұрақты түрде өткізіледі. Олар мамандардың біліктілігін арттыруға, озық халықаралық тәжірибемен алмасуға және Орталық Азия мемлекеттері арасындағы ынтымақтастықты нығайтуға мүмкіндік береді.

Қазіргі уақытта Қазақстан көші-қон саясаты саласындағы өңірлік өзара іс-қимылды дамыту, халықаралық қорғау тетіктерін жетілдіру және мемлекеттік органдардың кәсіби әлеуетін нығайту жұмыстарын жалғастырып жатыр.