Алматы халықаралық әуежайы Flydubai әуе компаниясының Дубай – Алматы – Дубай бағыты бойынша алғашқы жүк рейсін қабылдады. Жаңа бағыттың ашылуына орай әуежайда салтанатты рәсім ұйымдастырылып, әуе кемесі дәстүрлі су аркасымен қарсы алынды.

Аталған бағыт бойынша жүк рейстері Boeing 737 ұшақтарымен аптасына бір рет орындалады.

Жаңа бағыт Алматы мен Дубай арасындағы тікелей әуе жүк қатынасын қамтамасыз етеді. Бұл екі қаланың Орталық Азия мен Таяу Шығыстағы маңызды көлік-логистикалық орталықтар ретіндегі маңызын арттырады.

Тұрақты рейстер экспорттық-импорттық тасымалдарды дамытуға, логистикалық ынтымақтастықты кеңейтуге және сауда-экономикалық байланыстарды нығайтуға қосымша мүмкіндік береді.

Алматы халықаралық әуежайы әлемнің негізгі логистикалық орталықтарымен жүк әуе қатынасын дамытуды жалғастырып, жүк тасымалының мүмкіндіктерін кеңейтуге және қаланың Орталық Азиядағы авиациялық-логистикалық орталық ретіндегі орнын нығайтуға басымдық беріп отыр.