Агроөнеркәсіптік кешенде цифрландыру Орнықты даму мақсаттары 2-ні іске асырудың маңызды тетігіне айналды. Фермерлерге субсидия мен мемлекеттік қолдау алу бойынша кеңес беретін жасанды интеллект көмекшісі енгізіліп жатыр, — деді Жаслан Мәдиев Сенатта Орнықты дамуы саласындағы ұлттық мақсаттардың іске асырылуын мониторингілеу жөніндегі парламенттік комиссияның XI отырысында.
Сонымен қатар «Электрондық агроөнеркәсіп кешені (е-АӨК)» экожүйесі құрылып жатыр, ол Smart Farming технологиясына негізделген.

— 2028 жылға қарай ауыл шаруашылығы жерлерінің кемінде 50 пайызы цифрлық бақылауға алынады деп жоспарланған. Бұл егін өнімділігін 20–25 пайызға арттырып, құрғақшылық пен зиянкестерден болатын шығындарды азайтады.

Сонымен қатар, мал басының 90 пайызы RFID-белгілер мен жасанды интеллект арқылы таңбаланады. Бұл шаралар елдің азық-түлік қауіпсіздігін нығайтады, — деді министр.
Осы орайда ол агроөнеркәсіп кешенін цифрландыру саланы жаңғыртуға, ауыл шаруашылығын тұрақты дамыту жөніндегі жаһандық мақсаттарға елеулі үлес қосатынын атап өтті.