Қазақстан мен Еуропалық инвестициялық банк (ЕИБ) энергетика саласындағы ынтымақтастықты кеңейтуді жоспарлап отыр. Астанада өткен кездесуде энергетика вице-министрі Ержан Ертаев пен ЕИБ вице-президенті Марек Мора өзара іс-қимылдың перспективаларын талқылады.

Келіссөздер барысында энергетикалық қауіпсіздік, инфрақұрылымды жаңғырту және энергетикалық көшу мәселелеріне басымдық берілді. Сонымен қатар жаңартылатын энергия көздерін пайдалануды кеңейту перспективалары қаралды.

Бірлескен энергетикалық жобаларды іске асыру ынтымақтастықтың негізгі бағыттарының біріне айналуы мүмкін. Кездесуге қатысушылар инвестиция тарту мүмкіндіктерін, сондай-ақ Еуропалық инвестициялық банктің техникалық және сараптамалық қолдау көрсету әлеуетін талқылады.

Тараптар өңірлік энергетикалық ынтымақтастықты дамыту және энергетика секторының тұрақты дамуы үшін маңызды ірі инфрақұрылымдық жобаларды іске асыру мәселелері бойынша да пікір алмасты.

Энергетика министрлігінде халықаралық қаржы институттарымен және еуропалық серіктестермен өзара іс-қимылды одан әрі дамытудың маңызы атап өтілді. Мұндай ынтымақтастық қосымша қаржы тартуға, халықаралық тәжірибе алмасуға және энергетика саласына заманауи тәсілдерді енгізуге мүмкіндік береді.

Кездесу қорытындысы бойынша Қазақстан мен ЕИБ диалогты жалғастыруға және энергетика саласындағы ынтымақтастықты одан әрі кеңейтуге мүдделі екенін растады.