2026 жылғы шілдеде Ұлттық банк есептейтін іскерлік белсенділік индексі (ІБИ) 49,8 пунктті құрады. Бұл маусым айымен салыстырғанда 0,1 пунктке төмен, яғни көрсеткіш 50 пункттік бейтарап деңгейден сәл төмен қалыптасты.

Сауалнамаға 561 кәсіпорын қатысты. Оның ішінде 42,1%-ы – шағын, 35,8%-ы – ірі және 22,1%-ы – орта бизнес өкілдері.

Ең жоғары іскерлік белсенділік Жетісу облысында (59,4), Ақмола облысында (58,8) және Шымкент қаласында (57,5) тіркелді. Ең төмен көрсеткіштер Алматы облысында (40,4), Ақтөбе облысында (45,5) және Маңғыстау облысында (46,4) байқалды.

Сонымен қатар бизнес-климат индексі 12,6 пунктке дейін өсті. Ұлттық банктің мәліметінше:

«Бизнес жүргізудің қазіргі жағдайына берілген баға жақсарды, сондай-ақ алдағы кезеңге қатысты кәсіпкерлердің оптимизмі артты».

Салалар бойынша жағдай әркелкі қалыптасып отыр:

• өндіріс – 52,2 пункт (+0,2);

• құрылыс – 51,8 пункт (-2,4);

• қызмет көрсету – 50,4 пункт (+0,6);

• тау-кен өнеркәсібі – 47,2 пункт (+0,6);

• сауда – 46,6 пункт (-1,4).

Өндіріс пен қызмет көрсету саласындағы кәсіпорындар сұраныстың артқанын атап өтсе, сауда және тау-кен өнеркәсібі өкілдері салық жүктемесінің өсуі, бизнесті қорғау деңгейінің төмендеуі және қаржыландыруға қолжетімділіктің қиындығын негізгі мәселелер ретінде көрсеткен.

Дереккөз: The Tenge.