Қазақстан Республикасы Премьер-министрінің орынбасары – Жасанды интеллект және цифрлық даму министрі Жаслан Мәдиев Hyundai Motor Group делегациясымен кездесті. Делегацияны компанияның атқарушы вице-президенті, болашақ стратегиясы департаментінің басшысы Хогын Чон (Hokeun Chung) басқарды.

Кездесу қорытындысы бойынша министрлік пен Hyundai Motor Company арасында өзара түсіністік туралы меморандумға қол қойылды.

Келіссөздер Қазақстан мен Оңтүстік Корея арасындағы стратегиялық әріптестікті дамыту аясында өтті. Бұл ынтымақтастық 2026 жылдың қыркүйегінде Мемлекет басшысы Қасым-Жомарт Тоқаевтың Корея Республикасына жасаған ресми сапарының қорытындыларымен де байланысты.

Қандай бағыттар бойынша ынтымақтастық дамиды?

Тараптар қалаларды цифрлық трансформациялау, жасанды интеллект, робототехника және физикалық жасанды интеллект (Physical AI) технологияларын енгізу перспективаларын талқылады.

Атап айтқанда, мынадай бағыттарға басымдық берілмек:

• интеллектуалды көлік жүйелерін дамыту;

• қалалық көлік қозғалысын басқару;

• сұраныс бойынша мобильділік қызметтерін енгізу;

• роботтандырылған жеткізу жүйелерін дамыту;

• ақылды тұрақтар құру;

• электр көліктеріне арналған зарядтау инфрақұрылымын дамыту.

Бірлескен пилоттық жобаларды жүзеге асыруға Алматы мен Алатау қалалары ықтимал алаң ретінде қарастырылып отыр. Тараптар заманауи технологиялық шешімдерді енгізу, оларды қолданыстағы қалалық цифрлық жүйелермен біріктіру және интеллектуалды қалалық инфрақұрылым қалыптастыру мүмкіндіктерін талқылады.

Меморандумда не қарастырылған?

Қол қойылған құжат тәжірибе және технологиялық құзыреттермен алмасуды, пилоттық жобаларды іске асыру мүмкіндіктерін бірлесіп зерттеуді және кәсіби мамандардың біліктілігін арттыруды көздейді.

Сонымен қатар ынтымақтастықты үйлестіру үшін бірлескен жұмыс тобын құру жоспарланған.

Серіктестіктің мақсаты – озық технологияларды қалалық басқару жүйесінде іс жүзінде қолдану, көлік және қала инфрақұрылымының тиімділігін арттыру, сондай-ақ кейіннен Қазақстанның басқа өңірлеріне таратуға болатын инновациялық шешімдерді дамыту.

Нақты жобалар мен оларды жүзеге асыру шарттары тараптар арасында қосымша келісіліп, Қазақстан заңнамасына сәйкес айқындалады.

Анықтама: Hyundai Motor Group – құрамына Hyundai Motor Company және Kia кіретін халықаралық компаниялар тобы. Холдинг автомобиль өндірісі, автокомпоненттер, құрылыс, логистика және басқа да салаларда жұмыс істейді. Сонымен қатар болашақ мобильділігі, робототехника, жасанды интеллект және ақылды қалалар бағыттарын дамытып келеді.