Ауғанстанның Герат қаласында Қазақстан Республикасы Президентінің Ауғанстан жөніндегі арнайы өкілі Еркін Тұқымов бастаған қазақстандық ресми және іскерлік делегацияның қатысуымен бірқатар іс-шара өтті.

Сапар барысында Еркін Тұқымов Герат провинциясының губернаторы Нур Ахмад Исламжармен кездесті. Кездесуде Қазақстан мен Ауғанстан арасындағы сауда-экономикалық және өңіраралық ынтымақтастықтың қазіргі жағдайы мен даму перспективалары талқыланды.

Тараптар өңірлердің экономикалық әлеуетін тиімді пайдалану және екі елдің іскер топтары арасындағы тікелей байланысты кеңейту мүмкіндіктері бойынша пікір алмасты.

«West2West» форматы дамып келеді

Кездесулерде Қазақстанның батыс өңірлері мен Ауғанстанның батыс аймақтары арасындағы тікелей байланыстарды жолға қоюға бағытталған «West2West» форматына ерекше мән берілді.

Бұл бастама аясында сауда, өнеркәсіптік кооперация, көлік және логистика салаларындағы өзара іс-қимылды күшейту көзделіп отыр.

Іс-шараларға Қазақстанның Сауда және интеграция министрлігінің, Маңғыстау және Батыс Қазақстан облыстары әкімдіктерінің, сондай-ақ екі елдің бизнес-қоғамдастығы өкілдері қатысты.

Гератта бизнес-форум өтті

Сапар аясында «Қазақстан – Ауғанстан: өңіраралық ынтымақтастық» атты бизнес-форум ұйымдастырылды.

Жиында өзара сауда көлемін арттыру, кәсіпкерлер арасында тікелей іскерлік байланыстар орнату, өнеркәсіптік кооперацияны дамыту және көлік-логистикалық қатынастарды кеңейту мәселелері талқыланды.

Ауғанстан тарапы форум аясында өнеркәсіп тауарлары, ауыл шаруашылығы өнімдері мен азық-түлік түрлерін таныстырған көрме ұйымдастырды.

Сонымен қатар Гератта қазақстандық «Integra Construction KZ» ЖШС компаниясының қатысуымен салынған «Хаф – Герат» теміржолының үшінші учаскесінің салтанатты ашылуы өтті.

Қазақстан экспорты 573 млн долларға жуықтады

2026 жылғы қаңтар–шілде айларында Қазақстан мен Ауғанстан арасындағы тауар айналымы 581,1 млн долларға жетіп, өткен жылдың сәйкес кезеңімен салыстырғанда 2,4 есеге артты.

Оның ішінде Қазақстанның Ауғанстанға экспорты 572,9 млн долларды құрады. Экспорт құрылымында ұн 215,6 млн доллар, бидай 122 млн доллар, өсімдік майы 51,1 млн доллар көлемінде болды.

Ал Ауғанстаннан Қазақстанға импорт көлемі 8,2 млн долларды құрады.

Бұл көрсеткіштер Ауғанстаннан кептірілген жемістер, шафран, жүзім, кілемдер және басқа да тауарларды жеткізуді арттыру үшін қосымша мүмкіндіктер бар екенін көрсетеді.

Гераттағы кездесулер «West2West» форматын практикалық тұрғыдан дамытудағы маңызды кезеңдердің бірі болды. Тараптар тікелей диалогты жалғастырып, келісілген ынтымақтастық бағыттарын нақты жобалар мен сауда операцияларына айналдыруға мүдделі екенін растады.