— Өнеркәсіпте жарты жыл ішінде өндіріс көлемі 28,9 трлн теңге болып, 6,5 пайызға өсті. Оның ішінде өңдеу өнеркәсібі 13,7 трлн теңгеге өнім өндірді. Бұл өткен жылғы көрсеткіштен 5,5 пайызға жоғары. Өңдеуші сектордың елдің жалпы ішкі өнімге қосқан үлесі — 12,4 пайыз. Бұл өсім машина жасау, химия өнеркәсібі, құрылыс материалдарын өндіру және азық-түлік өнімдері көрсеткіштерінің артуы есебінен қамтамасыз етілді. Биыл жалпы құны шамамен 1,5 трлн теңге болатын 190 жобаны іске қосу жоспарланған. Оның 196 млрд теңге сомасына 47 жоба іске қосылды, 3 мыңнан астам жуық жұмыс орны құрылды, — деді Үкімет басшысының бірінші орынбасары.
Оның атап өтуінше, маңызды бағыттардың бірі — көлік инфрақұрылымын дамыту.

— Бірқатар ірі теміржол жобасы іске асырылып жатыр. «Достық — Мойынты» және «Алматы қаласының айналма жолы» жобалары аяқталу сатысында. Келесі жылы «Мойынты — Қызылжар», «Дарбаза — Мақтаарал» жобалары аяқталады. Ал 2027 жылы «Бақты — Аягөз» жобасы іске қосылады. Жыл соңына дейін 175 жаңа жолаушылар вагонын сатып алу жоспарланып отыр, — деді Роман Скляр.
Бірінші вице-премьердің айтуынша, әуе хабтарын дамыту және әуе жүктерін өңдеу көлемін арттыру мақсатында әуежай инфрақұрылымы жаңғыртылуда. Кедендік рәсімдер жеңілдетіліп, цифрлық шешімдер енгізіліп жатыр.

— Зайсан, Катонқарағай және Кендірлі курорттық аймақтарында әуежай құрылысы басталды. Автокөлік жолдары саласында 12 мың шақырым жол құрылыс және жөндеу жұмыстарымен қамтылған. Оның 7 мың шақырымын осы жылдың соңына дейін аяқтау жоспарланып отыр, — деді ол.