Елімізде кәсіпкерлер фискалды чектерді бермей, салықтан қашады. Бұл мәселе барлық өңірде бар екені жасырын емес. Бірақ бұған чек талап етпейтін тұтынушылар да жауапты. Сол үшін біз салықтық бақылаудан бөлек, азаматтарды чек талап етуге ынталандыратын өзге бір жолын қарастыруды шештік, — дейді ҚР ҚМ МКК-нің арнайы салық режимдерін әкімшілендіру басқармасының басшысы Ерқанат Шынберген Kazinform тілшісіне берген сұхбатында.
Salyq Кэшбэк пилоттық жобасы былтыр 15 тамыздан басталған. Алғашында Семей қаласы мен Ақмола облысындағы Ақкөл ауданында жүргізілген жоба қазір 46 өңірде жұмысын жалғастырып жатыр.

— Әуелі, 15 тамыздан жыл соңына дейін 2 өңірде сынақтан өткіздік. Осы кезеңде 2 аймақтағы тұрғындардың чек талап етуі едәуір ұлғайды. Яғни, чектердің саны 2 есеге артты. Ал биыл 46 ауданда әзірленді. Қазір тәртіптің 18 пайызға артқанын байқап отырмыз, — дейді басқарма басшысы.
Amian қосымшасы арқылы фискалдық чектегі QR-кодты сканерлесеңіз, саудаға жұмсаған қаржыңыздың 2 пайызын кэшбэк ретінде қайтаруға болады. Бұл шағын және орта кәсіпкерліктен алынатын фискалдық чектерге ғана қатысты. Алайда 1 айда 70 чектен артық тіркей алмайсыз. Ең көп сыйақы мөлшері — 20 мың теңге.

— Жыл соңына дейін осы пилоттық жобаны мүмкіндігінше көп аудандарда жүзеге асырып, кейін Салық кодексіне белгілі бір өзгертулер енгізу және осы жобаны мемлекет деңгейінде жүргізіп, кассалық тәртіп деңгейін көтеруді жоспарлап отырмыз, — дейді маман.
Бұл жобаның басты мақсаты — еліміздегі кассалық тәртіпті сақтау және оның деңгейін арттыру. Дәл осы себептен Salyq Кэшбэктен бөлек тағы 3 жоба жұмыс істейді.

— Бұдан өзге тағы «Чекті талап ет», «Бәйге», «Әмиян және Халық банк» пилоттық жобалары жүзеге асырылып жатыр. Нәтижесінде 200 мыңнан астам тұрғын жобаға қатысып, сыйақы алып үлгерді, — дейді Ерқанат Шынберген.