2026 жылдың алғашқы тоғыз айында Қазақстандағы бөлшек сауда көлемі 20,05 трлн теңгеге жетіп, өткен жылдың сәйкес кезеңімен салыстырғанда 4,5%-ға артты. Ал көтерме сауда айналымы 40,7 трлн теңгені құрап, 2025 жылғы қаңтар–қыркүйек айларындағы көрсеткіштен 7%-ға жоғары болды. Бұл туралы Ұлттық статистика бюросы хабарлады.

Есепті кезеңде «Сауда» саласының нақты көлем индексі 106,2%-ды құрады. Өткен жылдың сәйкес кезеңінде бұл көрсеткіш 108,8% болған. Көтерме саудада нақты көлем индексі 107%-ға жетсе, бір жыл бұрын 109,6% болған. Бөлшек саудадағы көрсеткіш 104,5%-ды құрап, өткен жылғы 107,1%-дан төмендеді.

Көтерме саудада Алматы мен Астана көш бастап тұр

Сауданың жалпы көлеміндегі көтерме сауданың үлесі 66,6%-ды, ал бөлшек сауданың үлесі 32,8%-ды құрады.

Қаңтар–қыркүйек айларында көтерме сауда айналымы 40,7 трлн теңгеге жетті. Оның құрылымында азық-түлікке жатпайтын тауарлар мен өндірістік-техникалық мақсаттағы өнімдердің үлесі басым. Олар жалпы көтерме сауда көлемінің 80%-ын құрайды.

Көтерме сауда айналымының ең үлкен үлесі Алматы қаласына тиесілі — 35,1%. Одан кейін Астана қаласы 14,5%, Атырау облысы 13,5% және Шымкент қаласы 6,3% көрсеткішпен орналасқан.

Азық-түлік тауарларының бөлшек саудасы 10,1%-ға өсті

Есепті кезеңде бөлшек сауда көлемі 20,05 трлн теңгені құрады. Сауда кәсіпорындары арқылы тауар өткізу көлемі 2,1%-ға артса, базарларда жұмыс істейтіндерді қоса алғанда, жеке кәсіпкерлердің бөлшек саудасы 9,3%-ға өсті.

Бөлшек сауда айналымының негізгі бөлігі жеке меншік нысанындағы кәсіпорындарға тиесілі. Олар тоғыз айда 17,95 трлн теңгенің тауарын өткізіп, жалпы көлемнің 89,6%-ын қамтамасыз етті. Шетелдік меншік нысанындағы кәсіпорындардың үлесі 2,09 трлн теңге немесе 10,4% болды.

Бөлшек сауда құрылымында азық-түлік тауарларының үлесі 35,1%, ал азық-түлікке жатпайтын тауарлардың үлесі 64,9%-ды құрады. Бұл ретте азық-түлік өнімдерін сату көлемі өткен жылдың сәйкес кезеңімен салыстырғанда 10,1%-ға өсті. Ал азық-түлікке жатпайтын тауарлардың сатылымы 1,6%-ға артты.

Бөлшек сауда айналымы бойынша Алматы қаласы бірінші орында тұр. Оның үлесіне республикадағы жалпы көлемнің 32,8%-ы тиесілі. Астана қаласының үлесі — 14,2%, Қарағанды облысының үлесі — 7%, Шығыс Қазақстан облысының үлесі — 5,3%.

2026 жылғы 1 қазандағы жағдай бойынша есеп берген сауда кәсіпорындарының бөлшек саудадағы тауарлық қоры 1,64 трлн теңгені құрады. Бұл қор 62 күндік сауда көлеміне тең.

Дереккөз: Қазақстан Республикасы Ұлттық статистика бюросы.