— Елімізде балалардың саны 7 миллионға жуықтады, бұл халықтың 35 пайызы. Бала құқықтары туралы конвенцияға сәйкес, мемлекет кәмелетке толмағандардың психикалық және физикалық саулығына зиян келтіруі мүмкін ақпараттар мен материалдарға қол жеткізуін болдырмауы тиіс. Осы орайда 2023 жылы Оқу-ағарту министрлігі ЮНИСЕФ бірлесіп зерттеу жүргізді. Зерттеудің мақсаты — балалардың цифрлық сауаттылығын тексеріп, интернеттен келуі мүмкін қауіптерді анықтау. Нәтиже алаңдатарлық болып шықты, — деді Насымжан Оспанова.
Балалардың құқығын қорғау комитеті басшысының айтуынша, ақпарат баланың психикасына айтарлықтай әсер етеді. Кез келген ақпараттың екі қыры бар. 

— Жағымсыз ақпараттарға келсек, баланың ойын өзгертеді және бұрмалайды, қиялына ықпал етеді, жаңа мінез-құлық үлгісін қалыптастырады, соның салдарынан оның психикалық және психо-эмоционалдық денсаулығына зиян келеді. Одан бөлек, балалар арасындағы зорлық-зомбылық, жеке деректі қолдану қаупі бар, — дейді ол.
Бүгін елордада ЛГБТ насихаттың балалар мен жасөспірімдерге әсерін зерттеу нәтижесі талқыланды. Аталған шараға сарапшылар, ғалымдар, мемлекеттік органдар өкілдері, депутаттар мен қоғамдық ұйымдар өкілдері қатысты. 

Айта кетейік, зерттеу нәтижесінде белгілі болғандай, қазақстандық жасөспірімдердің 10-12 пайызы бейтаныс адаммен кездесуге барғанын мойындаған.