Қазақстандағы ірі банктер қаржылық бұзушылықтарға қарсы күресу үшін жасанды интеллект енгізуге міндеттеледі

Қазақстан Республикасының Қаржы нарығын реттеу және дамыту агенттігі (ҚНРДА) заңсыз қаржылық операциялар тәуекелдерін басқарудың жаңа шараларын ұсынды. Мұндай операцияларға есірткі саудасымен, қаржы пирамидаларымен және онлайн-казино қызметімен байланысты транзакциялар жатады. Осыған байланысты агенттік банк қызметін реттейтін нормативтік актілерге өзгерістер енгізу туралы қаулы жобасын жариялады.

Жаңа талаптардың бірі – жүйелік маңызы бар және әлеуетті жүйелік маңызы бар банктердің жасанды интеллект пен машиналық оқытуға негізделген цифрлық шешімдерді қолдануы. Бұл технологиялар қаржылық операцияларды қадағалауға, күмәнді клиенттерді («дропперлерді») анықтауға және заңсыз транзакцияларды бұғаттауға мүмкіндік береді.

Сонымен қатар, банктер келесі клиенттер тобына бақылауды күшейтуге міндеттеледі:

• әртүрлі банктерден бес немесе одан да көп төлем карталары бар адамдар;

• шекара маңындағы аудандарда тіркелген карталардың иелері;

• Қазақстанда тұруға ықтиярхаты немесе тұрақты тұруға рұқсаты жоқ резидент емес тұлғалар;

• 14-25 жас аралығындағы азаматтар, егер олардың ресми табыс көзі болмаса және есепшотында тек ішкі немесе трансшекаралық аударымдар жүргізілсе.

Сондай-ақ, банктер күмәнді трансшекаралық төлемдер мен 500 000 теңгеден жоғары аударымдарды қадағалайтын болады. Егер төлем картасының иесі күнделікті өмірге қажетті төлемдерді жасамаса және банк сұранысына жауап бермесе, оған жоғары тәуекел деңгейі тағайындалуы мүмкін.

Бұл шаралар қаржылық қылмыстармен күресуге және Қазақстанның банк жүйесін заңсыз операциялардан қорғауға бағытталған.