Үкімет отырысында 2027–2029 жылдарға арналған әлеуметтік-экономикалық даму болжамы мен бюджет параметрлерін қарау барысында Ұлттық банктің баяндамасы ұсынылды. Құжатта реттеуші инфляцияның қазіргі динамикасына, сыртқы сауда жағдайына және Ұлттық қор қаражатын пайдалану тәсілдеріне тоқталды.

Басты мәселелердің бірі инфляция болды. Ұсынылған мәліметтерге сәйкес, оның жылдық деңгейі өткен жылдың қыркүйегіндегі ең жоғары 12,9%-дан 10,2%-ға дейін төмендеген. Инфляцияның төмендеуі қатарынан он ай бойы жалғасып келеді.

Ұлттық банк бұл динамиканы қалыпты қатаң ақша-кредит саясатымен, айырбас бағамының нығаюымен, тұтынушылық кредиттеудің қалыпқа келуімен, сондай-ақ Үкімет пен реттеуші қабылдаған инфляцияға қарсы бірлескен шаралармен байланыстырады.

Сонымен қатар Ұлттық банк инфляция деңгейі әлі де жоғары екенін атап өтті.

«Инфляция жоғары деңгейде қалып отыр. Сыртқы және ішкі инфляциялық тәуекелдер сақталуда».

Баға өсімін одан әрі тежеу үшін Ұлттық банк қалыпты қатаң ақша-кредит саясатын жалғастыруда. Қосымша шаралар, оның ішінде алтын сатып алу операцияларын айнадай көрсету тетігі аясында биылғы жылдың жеті айында экономикадан 2,4 трлн теңге алынды. Жыл қорытындысы бойынша бұл көрсеткіш шамамен 4,1 трлн теңгеге жетеді деп күтілуде.

Сонымен қатар ең төменгі резервтік талаптарды кезең-кезеңімен арттыру жалғасып жатыр. Реттеушінің бағалауынша, бұл шамамен 4 трлн теңгені байланыстыруға, ақша-кредит саясаты құралдарына жұмсалатын шығындарды азайтуға және ақша базасын қысқартуға мүмкіндік береді.

Баяндамада кредиттеу нарығындағы жағдайға да назар аударылды. Бірлескен макро және микропруденциялық шаралардың нәтижесінде халықты кредиттеу біртіндеп қалыпқа келіп, кредиттік ресурстар бизнеске бағыттала бастаған.

Ұлттық банк нарықтағы жағдайды бақылауды жалғастырады. Кредиттеудің жекелеген сегменттеріндегі тәуекелдер күшейген жағдайда қосымша макропруденциялық реттеу шаралары қарастырылуы мүмкін.

Баяндаманың тағы бір маңызды бөлігі сауда балансына арналды. Болжамға сәйкес, 2027–2029 жылдар аралығында сауда балансы профицит аймағында сақталады. Қазақстанның жекелеген экспорттық тауарлары бағасының төмендеуі мен импортқа сұраныстың жоғары болуына қарамастан, төлем балансының ағымдағы шоты тұрақты болады деп күтілуде.

Ұлттық банк Ұлттық қордан алынатын қаражат көлемінің жоспарлы ұлғаюына да тоқталды. Үкімет 2027–2029 жылдарға арналған қаражат алу көлемін 5 трлн теңгеге арттыруды қайта қараған. Бұл қаражатты әлеуметтік, коммуналдық, энергетикалық және көлік инфрақұрылымы жобаларын қаржыландыруға бағыттау жоспарланып отыр.

Ұлттық банк аталған қаражатты пайдалану кезінде жобаларды нақты басымдықтарға сәйкес іріктеп, олардың тиімділігіне бақылау орнатудың маңызын атап өтті.

«Жобаларды салалық және өңірлік тұрғыдан нақты басымдықтарға бөлуді қамтамасыз ету маңызды».

Бұдан бөлек, реттеуші отандық бизнесті өндіріс көлемін ұлғайтуға алдын ала дайындау, қазақстандық құрылыс компанияларын жобаларға кеңінен тарту және бөлінген қаражаттың мақсатты пайдаланылуын бақылау қажет деп санайды.

Ұлттық қор қаражатының жұмсалуын бақылау үшін цифрлық теңгені пайдалану мүмкіндігі де атап өтілді. Сонымен қатар қаржыландыру тетіктерін салық органдарымен интеграциялау ұсынылып отыр. Бұл жобалардың ашықтығын арттырып, өңірлерге түсетін салықтық қайтарымды қамтамасыз етуге мүмкіндік береді.

Қорытындылай келе, Ұлттық банк өзінің негізгі басымдықтары баға және қаржылық тұрақтылық болып қала беретінін мәлімдеді. Бұл бағыттар тұрақты әрі сапалы экономикалық өсімге және халықтың әл-ауқатын арттыруға жағдай жасауға бағытталған.