«ҚазМұнайГаз» ұлттық компаниясы қолданыстағы кен орындарынан қосымша 155 млн тонна мұнай өндіруді жоспарлап отыр. Бұл мақсатқа мұнай бергіштік коэффициентін арттыратын заманауи технологияларды енгізу арқылы қол жеткізу көзделген.

Компанияның мәліметінше, көптеген кен орындары бірнеше ондаған жыл бойы пайдаланылып келеді. Қабат қысымының төмендеуі мен ұңғымалардың сулануы өндіріс көлемін тұрақты ұстап тұруды қиындатып, шығындарды арттыруда. Сондықтан ҚМГ игеріліп жатқан кен орындарының тиімділігін көтеруге басымдық беруде.

Осы бағытта көлденең бұрғылау, көпсатылы гидравликалық жару, қосымша оқпандарды бұрғылау, полимерлік су айдау және жылулық әсер ету әдістері қолданылып жатыр.

Жаңа технологиялар алдымен жекелеген ұңғымаларда сынақтан өткізіледі. Тиімділігі дәлелденген жағдайда олар кең көлемде өндіріске енгізіледі.

ҚМГ стратегиясы аясында мұнай өндіруді арттыруға бағытталған тоғыз негізгі технология анықталған. Оларды қолдану нәтижесінде кен орындарын игерудің бүкіл кезеңінде қосымша 155 млн тонна мұнай өндіру және мұнай бергіштік коэффициентін 37%-дан 42%-ға дейін көтеру жоспарланып отыр.

Алғашқы нәтижелер де байқала бастады. 2026 жылдың қаңтар-тамыз айларында жаңа технологиялардың көмегімен шамамен 424 мың тонна қосымша мұнай өндірілді. Бұл жоспарланған 387 мың тоннадан 9,6%-ға артық.

Жыл соңына дейін компания қосымша мұнай өндіру көлемін шамамен 1 млн тоннаға жеткізуді көздеп отыр. Бұл ҚМГ-ның жалпы өндірісінің шамамен 5%-ына тең. Ал 2025 жылы технологиялық шаралардың нәтижесінде қосымша 434 мың тонна мұнай алынған.

Өндірісті цифрландыру да компанияның негізгі басымдықтарының бірі болып отыр. Атап айтқанда, «Ембімұнайгазға» қарасты Шығыс Молдабек кен орнында цифрлық егіз технологиясы енгізілуде. Бұл жүйе өндіріс көрсеткіштерін болжауға, технологиялық процестерді талдауға және жасанды интеллект арқылы тиімді шешімдер қабылдауға мүмкіндік береді.

Сонымен қатар ҚМГ жасанды интеллект пен үлкен деректерге негізделген ABAI жүйесін дамытып жатыр. Платформа ұңғымалардың жұмысын бақылауға, су айдау процестерін басқаруға және геологиялық-техникалық шараларды тиімді жоспарлауға арналған.

Компания жаңа кен орындарын игерумен қатар, қолданыстағы активтердің өндірістік әлеуетін барынша пайдалануды көздейді. Бұл мұнай өндіру көлемін тұрақтандыруға және ұзақ мерзімді тиімділікті арттыруға мүмкіндік береді.

Дереккөз: «ҚазМұнайГаз» ҰК АҚ.