Қазақстан проблемалық және жұмыс істемейтін активтерді экономикалық айналымға қайтару бойынша тәжірибесін IPAF халықаралық саммитінде ұсынды.

Премьер-министрдің орынбасары – ұлттық экономика министрі Серік Жұманғариннің айтуынша, қазіргі жағдайда қаржы секторындағы тәуекелдерді алдын ала басқару және капиталды нақты экономикаға бағыттау маңызды.

«Біздің міндетіміз – қаржы институттары мен мемлекеттік операторлардың жұмыс істемейтін портфельдердегі ресурстарды "қатыруына" жол бермеу. Әрбір теңге нақты экономикаға жұмыс істеуі, жаңа өндірістерді, инфрақұрылымды қаржыландыруы және жұмыс орындарын құруы тиіс», — деді ол.

Қазақстандағы негізгі оператор – «Проблемалық кредиттер қоры» АҚ трансформациядан өтуде. 2026 жылғы 1 қаңтарда Қор портфелі шамамен 160 млрд теңгені құрады, оның 130 млрд теңгеден астамы қаржылық сауықтырудағы жобаларға тиесілі.

Қаржы министрі Мәди Такиев проблемалық активтерді ұзақ уақыт экономикадан тыс қалдырмай, оларды қайта айналымға енгізу қажеттігін атап өтті.

«Олар ашық нарықтық баға алып, тиімді басқаруға көшіп, экономика үшін қайта жұмыс істеуі керек», — деді министр.

2019 жылдан бері Қордың Ұлттық қорға аударымдары 145 млрд теңгеге жетті. Ал 2025 жылы мемлекет меншігіне жалпы құны 71 млрд теңге болатын қоғамдық және әлеуметтік маңызы бар активтер қайтарылды.

Проблемалық активтерден капиталды босату бизнесті қаржыландыруға да әсер етуде. 2026 жылдың алғашқы бес айында корпоративтік секторға берілген жаңа кредиттер 14,8%-ға өсіп, 8,9 трлн теңгеге жетті.