Қазақстан мен Өзбекстан Қытай–Қазақстан–Өзбекстан бағыты бойынша жүк тасымалы көлемін ұлғайтуға бағытталған бірлескен шараларды пысықтап жатыр.

10–11 тамызда екі елдің көлік ведомстволарының өкілдері Қазақстанның Қытаймен шекарасындағы негізгі көлік-логистикалық нысандарға барды. Делегациялар «Алтынкөл» станциясын, «Кедентранссервис» терминалын, «KTZE-Khorgos Gateway» құрғақ портын және «Қорғас – Шығыс қақпасы» АЭА-ын аралады.

Өзбекстан өкілдеріне Қытайдан келетін жүктерді қабылдау, өңдеу және қайта тиеу тәртібі, сондай-ақ Қазақстанның теміржол және терминалдық инфрақұрылымының мүмкіндіктері таныстырылды.

Келіссөздерде негізгі назар жүк ағынын ұлғайтуға, терминалдық қуаттарды тиімді пайдалануға және жаңа логистикалық шешімдерді дамытуға аударылды.

Тараптар тасымал көлемін арттыру, инфрақұрылымды дамыту және екі ел арасындағы көлік-логистикалық ынтымақтастықты күшейту бойынша бірлескен жұмысты жалғастыруға келісті.