Қазақстанда ипотекалық несие беретін 10 банк бар. Ең тиімді мөлшерлемелер негізінен тұрғын үй жинақ жүйесі мен депозитті кепілге қою арқылы берілетін ипотекаларда ұсынылады.

Депозитті кепілге қою арқылы ипотеканы Bereke Bank, ForteBank және Банк ЦентрКредит береді. Бұл жағдайда сатып алынатын баспананың толық құнына пайыз есептеледі, ал кепілдегі депозит несие өтелгеннен кейін қайтарылады. Ең төменгі СЖТМ Банк ЦентрКредитте – 6%-дан 17,7%-ға дейін. ForteBank-те – 9,53%-дан, Bereke Bank-те – 14,87%-дан басталады. Үш банкте де несие мерзімі 180 айға дейін.

Тұрғын үй жинақ жүйесі бойынша ипотеканы Halyk Bank, Банк ЦентрКредит, Freedom Bank және Отбасы банк ұсынады. Мұнда қарыз алушы алдымен депозитке қаражат жинайды. Кейбір бағдарламаларда тиімді мөлшерлемеге өту үшін кемінде 36 ай жинақтап, тұрғын үй құнының 50%-ын жинау қажет.

Ең төменгі мөлшерлемелер Отбасы банкте: тұрғын үй қарызы бойынша СЖТМ 3,6%-дан 6,9%-ға дейін, аралық қарыз бойынша 9%-дан 9,6%-ға дейін, ал алдын ала берілетін қарыз бойынша 2%-дан 24,3%-ға дейін. Halyk Bank-те СЖТМ 5,1%-дан, Freedom Bank-те 11,01%-дан басталады.

Сонымен қатар нарықта стандартты ипотека және серіктестік бағдарламалар бар. Серіктестік ипотеканың басты ерекшелігі – баспананы тек белгілі бір құрылыс компаниялары немесе тұрғын үй кешендерінен сатып алуға болады.

Осылайша, төмен мөлшерлемеге ұмтылған азаматтар үшін тұрғын үй жинақ жүйесі тиімдірек болуы мүмкін, бірақ ол алдын ала қаражат жинауды талап етеді. Ал депозитті кепілге қою арқылы ипотека баспана сатып алуды бірден жоспарлаған, бірақ жеткілікті қаражаты депозитте бар клиенттерге қолайлы.

Толығырақ: ranking.kz