Қазақстанда медицина қызметкерлерін әлеуметтік қолдау шаралары күшейтіліп жатыр. Биыл дәрігерлер мен денсаулық сақтау саласы мамандарының жалақысын арттыруға республикалық бюджеттен 33 млрд теңге бөлінді.

Бұл туралы медицина қызметкерлері күніне арналған салтанатты жиында сөйлеген сөзінде Қазақстан Президенті Қасым-Жомарт Тоқаев мәлімдеді.

Мемлекет басшысының айтуынша, соңғы үш жылда денсаулық сақтау саласы қызметкерлеріне көрсетілетін мемлекеттік қолдау көлемі жеті есеге артқан. Соның ішінде медицина мамандарының еңбекақысын кезең-кезеңімен көтеру жұмыстары жалғасып келеді.

— Соңғы үш жылда сала мамандарына көрсетілетін мемлекеттік қолдаудың көлемі 7 есе ұлғайды. Медицина қызметкерлерінің жалақысы кезең-кезеңімен көтеріліп келеді. Тек биылдың өзінде бұл мақсатқа қазынадан 33 миллиард теңге бөлінді. Осындай шаралардың арқасында медицина саласындағы кадрлық ахуал да тұрақтала түсті, — деді Президент.

Сонымен қатар мемлекет шалғай ауылдық елді мекендерде жұмыс істейтін дәрігерлерді қолдауға ерекше назар аударып отыр. Бұл бағытта біржолғы көтерме төлемдер қарастырылған.

Президенттің мәліметінше, өткен жылы ауылдық жерлерде еңбек ететін 530 медицина қызметкеріне жалпы көлемі 4,5 млрд теңге көлемінде қолдау көрсетілген.

Билік қабылданып жатқан шаралар денсаулық сақтау саласындағы кадр тапшылығын азайтып, өңірлердегі медициналық көмектің қолжетімділігін арттыруға ықпал етеді деп күтуде.