Премьер-министр Олжас Бектенов мемлекеттік органдар мен әкімдіктерге алдағы кезеңге арналған бюджеттерді қалыптастыру кезінде инфрақұрылымдық және әлеуметтік нысандарды озық салу басымдығын ескеруді тапсырды.

Үкімет отырысында Премьер-министр Президент Қасым-Жомарт Тоқаевтың бір күн бұрын ұлттық экономиканы дамыту және бюджетті жоспарлау мәселелері жөніндегі кеңесте берген тапсырмаларына тоқталды.

Үкімет басшысының айтуынша, Президент қажетті инфрақұрылым мен әлеуметтік нысандар құрылысын жеделдетуді бюджет саясатының негізгі басымдықтарының бірі ретінде белгіледі.

«Кеше экономиканы дамыту мәселелері жөніндегі кеңесте Мемлекет басшысы инфрақұрылымдық және әлеуметтік нысандарды озық салуды негізгі басымдықтардың бірі ретінде атады. Барлық мемлекеттік органдар мен әкімдіктер алдағы кезеңге арналған бюджеттерді қалыптастыру кезінде бұл мәселені бақылауға алуы қажет», — деп тапсырды Олжас Бектенов.

Бұл ретте инфрақұрылымға деген қажеттілікті бюджет жоспарлау кезеңінде ескеру көзделіп отыр. Бұл әлеуметтік және инфрақұрылымдық нысандар құрылысын өңірлердің даму қарқынына және тиісті қызметтерге сұраныстың өсуіне сай жүргізуге мүмкіндік береді.

Президенттің тапсырмасы 17 тамызда өткен ұлттық экономиканы дамыту және бюджетті жоспарлау мәселелері жөніндегі кеңесте айтылды. Сол кезде Қасым-Жомарт Тоқаев 2027–2029 жылдарға арналған бюджеттің негізгі басымдықтары аясында ауруханалар, балаларды оңалту орталықтары, мәдениет және спорт нысандарының құрылысын жеделдету қажеттігін атап өтті.

Енді мемлекеттік органдар мен әкімдіктер бюджет қаражатын жоспарлау және бөлу кезінде осы басымдықты ескеруі тиіс.