Алматыда тұрғындарға үйінен 500 метр радиуста орналасқан кез келген автотұрақты тегін пайдалануға мүмкіндік беретін тұрғын абонементі енгізіледі. Бұл жаңашылдық қалалық мәслихат қабылдаған жол қозғалысын ұйымдастырудың жаңа жобасында қарастырылған.

Құжатқа сәйкес, автотұрақтар ақылы, коммуналдық және жеке болып бөлінеді. Сондай-ақ жол белгілерімен жабдықтау, ақпараттық тақтайшалар, жұмыс режимі және төлем тәсілдеріне қойылатын талаптар нақтыланған.

Коммуналдық тротуарлық автотұрақтар сағат 08:00-ден 20:00-ге дейін жұмыс істейді және төлем минут сайын есептеледі. Сонымен қатар жеңілдік кезеңі енгізіледі: жолаушыларды отырғызу немесе түсіру үшін 5 минут, ал алаңдық автотұрақтан шығу үшін 10 минут тегін беріледі.

Төлемнің жүргізілуі мобильді және стационарлық фото-бейнебақылау кешендері арқылы бақыланады.

«Ардагерлер, мүгедектігі бар адамдар, көпбалалы аналар, электромобиль иелері және жедел қызметтер бұрынғыдай төлемнен толық босатылады», – деді Ержан Диханбаев.

Жаңа ережеге сәйкес, көпқабатты тұрғын үйлердің тұрғындары бір автокөлікті үйінен 500 метр радиустағы кез келген таңдалған автотұраққа тегін қоя алады.

«Нақты орын бекітілмейді, бұл тұрғындар мен басқа қала тұрғындарының мүдделері арасындағы тепе-теңдікті сақтауға мүмкіндік береді», – деп түсіндірді Ержан Диханбаев.

Тұрғындарға арналған автотұрақ абонементін пәтер иелері, олардың келісімімен бірге тұратын адамдар немесе тіркелген жалдау шарты негізінде пәтерді жалға алушылар рәсімдей алады.