Инвестициялар Қазақстан экономикасының өсуіне ықпал ететін негізгі факторлардың бірі болып қала береді. 2026 жылғы қаңтар–қыркүйек аралығында негізгі капиталға салынған инвестициялар көлемі 16,1 трлн теңгені құрап, өткен жылдың сәйкес кезеңімен салыстырғанда 7%-ға өсті. Бұл туралы Премьер-министрдің орынбасары — Ұлттық экономика министрі Серік Жұманғарин мәлімдеді.

Оның айтуынша, инвестициялық белсенділіктің негізгі қозғаушы күші жеке инвестициялар болды. Олардың көлемі 18,2%-ға артты. Жалпы инвестициялар құрылымындағы жеке сектордың үлесі 85,7%-ға жетті.

2026 жылдың бірінші жартыжылдығында Қазақстанға тікелей шетелдік инвестициялардың жалпы ағыны 9,4 млрд долларды құрады.

Қай салаларға инвестиция көптеп салынып жатыр?

Экономиканың бірқатар саласында инвестициялар көлемінің айтарлықтай өсуі байқалды:

• өңдеу өнеркәсібі — 40,1%-ға;

• құрылыс — 32%-ға;

• ақпарат және байланыс — 29,2%-ға;

• денсаулық сақтау — 20,4%-ға;

• ауыл шаруашылығы — 9,1%-ға өсті.

Осылайша, жеке сектор Қазақстандағы инвестициялық өсімнің негізгі көзі болып отыр. Ал инвестициялардың ең жоғары өсу қарқыны өңдеу өнеркәсібінде, құрылыста және ақпараттық-коммуникациялық технологиялар саласында тіркелді.

Дереккөз: ҚР Ұлттық экономика министрлігі.