Kaspi.kz «Қазақтелеком» суперкомпьютерінің есептеу қуатының 70%-ын бірден екі жылға алдын ала сатып алған. Бұл туралы компания басқарма төрағасы Багдат Мусин Kazakhstan Growth Forum 2026 аясындағы панельдік сессияда мәлімдеді.

Оның айтуынша, бұл жағдай қазақстандық бизнестің жасанды интеллектіге қажетті есептеу қуатын енді тестілік режимде емес, өнеркәсіптік ауқымда пайдалана бастағанын көрсетеді.

«Қазақтелеком» үшін жаңа бизнес бағыты

Мусин AI-дата-орталықтарын дамытуды тек технологиялық міндет емес, «Қазақтелеком» үшін жаңа бизнес бағыты ретінде қарастыратынын айтты.

«Қазір барлығы AI-дата-орталықтарымен айналысып жатқанымызды білетін шығар. Біз бүкіл мемлекеттің AI-инфрақұрылымын қалыптастырып жатырмыз — тек Қазақстан үшін ғана емес, жаһандық технологиялық ойыншылар үшін де. Біз республиканы әлемдік деңгейдегі дата-орталықтары бар хабқа айналдырғымыз келеді. Мұнда ақпарат өңделіп, жаһандық AI экономикасына қызмет көрсететін токендер қалыптасады», — деді ол.

Kaspi.kz — алғашқы ірі клиенттердің бірі

Мусиннің айтуынша, компания коммерциялық суперкомпьютерлік инфрақұрылымды іс жүзінде нөлден бастап дамытқан. Алғашқы ірі клиенттердің бірі Kaspi.kz болды.

«Мен “Қазақтелекомға” келген кезде бұл бағытпен айналысуға Президенттен рұқсат сұрадым және бизнеске арналған алғашқы суперкомпьютерді ұйымдастырдық. Бұған дейін цифрландыру бағытында үлкен жұмыс атқарған компаниялар қазір дамуды жеделдетіп жатыр. Біздің суперкомпьютеріміздің ресурстарының 70%-ын Kaspi бірден екі жылға алдын ала сатып алды. Яғни “Қазақтелеком” алдымен бүкіл елге арнап құрған қуаттың 70%-ын Kaspi алдын ала алып қойды», — деді Мусин.

Оның пікірінше, бұл Қазақстанда AI-есептеу қуатына сұраныс бар екенін және компаниялардың мұндай ресурстар үшін өнеркәсіптік көлемде ақы төлеуге дайын екенін көрсетеді.

Суперкомпьютер туралы

Әңгіме NVIDIA H200 графикалық үдеткіштері негізінде құрылған Al-Farabium AI-кластері туралы болып отыр. Мәлімделген сипаттамаларға сәйкес, оның өнімділігі FP16 форматында 56,4 петафлопсқа жетеді.

Бұл Орталық Азиядағы қуатты AI-кластерлерінің бірі саналады. Инфрақұрылым нейрондық желілерді оқыту және іске қосу, үлкен көлемдегі деректермен жұмыс істеу және жасанды интеллектке қатысты басқа да міндеттерді орындауға арналған.

«Қазақтелеком» жобасы үшін NVIDIA H200 жеткізілімі өндірушімен тікелей келісілген.

Компания AI-инфрақұрылымды қазақстандық бизнеске де, халықаралық ұйымдарға да ұсынуды жоспарлап отыр. Негізгі мақсат — компанияларға есептеу ресурстарын ел ішінде пайдалануға мүмкіндік беріп, деректердің Қазақстан аумағынан тыс жерге шығарылуын азайту.