Қазақстанда алтын бағасы соңғы аптада аздап төмендеді. Ұлттық банктің мәліметінше, 18 маусымдағы жағдай бойынша бір грамм алтынның құны 68 158,43 теңгені құрады.

Бір апта бұрын, 11 маусымда бағалы металдың бір грамы 68 192,25 теңгеге бағаланған болатын. Осылайша апталық төмендеу 33,82 теңгені құрады.

Алтын әлемдегі ең тұрақты металдардың бірі саналады. Жақында АҚШ-тағы Тулейн университетінің ғалымдары алтынның неге қараймайтынын және ғасырлар бойы өзінің табиғи жылтыры мен қасиеттерін сақтайтынын түсіндіретін зерттеу нәтижелерін жариялады.

Бұған дейін алтынның тот баспау қасиеті оның оттегімен әлсіз әрекеттесуіне байланысты деп есептеліп келген. Алайда жаңа зерттеу металл бетінде орналасқан атомдардың өздігінен қайта құрылып, ерекше қорғаныс қабатын қалыптастыратынын көрсетті.

Ғалымдардың айтуынша, бұл қорғаныс қабаты алтынның оттегімен химиялық реакцияға түсу ықтималдығын миллиардтаған, тіпті триллиондаған есе төмендетеді. Соның нәтижесінде алтын бұйымдар ондаған және жүздеген жылдар бойы бастапқы күйін сақтап қала алады.

Сарапшылардың пікірінше, дәл осы табиғи қасиет алтынды инвестициялық және зергерлік мақсатта ең сенімді бағалы металдардың бірі етеді.