Үкімет отырысында көптен күткен жоба таныстырылды. Шынын айтсам, оның жүзеге асатынына өзім де күмәнданған едім. Енді Qarmet, Allur және Kia Qazaqstan бірыңғай өндірістік тізбек құруды жоспарлап отыр: қазақстандық болат — қазақстандық шанақ бөлшектері — қазақстандық автокөлік құрастыру.

Іске асыру кезеңдері:

2028 жыл — Qarmet жеңіл автокөліктерге арналған стандарттарға сай автомобильдік болат табағын өндіруді бастайды.

2029 жыл — осы болат негізінде шанақ бөлшектерін сериялық шығару жолға қойылады.

Жобалық қуаты — жылына 100 мың шанақ.

Әрбір шанақтағы қазақстандық болаттың үлесі кемінде 75% болады.

Qarmet — Орталық Азиядағы ең ірі металлургиялық комбинат. Қазірдің өзінде компания Саран қаласындағы автобус зауытына болат жеткізіп келеді.

Премьер-министр Олжас Бектенов:

«Мүмкіндігіміз бола тұра, ондаған жыл бойы елімізде автомобильдік болат өндірісін жолға қоймағанымыз таңғалдырады. Қазір негізгі міндет — локализацияны барынша тереңдетіп, қосылған құнның мүмкіндігінше көп бөлігін ел ішінде қалдыру. Мемлекеттік қолдау мен бизнестің белсенді қатысуы арқылы осы бағытта, соның ішінде өзіміздің автокөлік брендтерімізді дамыту бойынша белсенді жұмыс істеуіміз қажет кезеңге келдік».

Қосылған құн енді үшінші елдердің металл мен шанақ бөлшектерін жеткізушілеріне кетпей, ел ішінде қалуы мүмкін. Жобаның сәтті жүзеге асуын күтеміз. Бұл бастама бұрыннан сұранысқа ие еді, ал толық іске асса, Қазақстанның автомобиль өнеркәсібін жаңа деңгейге көтеруге мүмкіндік береді.