Қазақстанда алдағы жылыту маусымына дайындық аясында энергетикалық нысандарды жөндеу жұмыстары жалғасып жатыр. Биыл электр станциялары, электр және жылу желілерін жаңартуға 384 млрд теңге қарастырылған. Бұл өткен жылмен салыстырғанда 9%-ға көп.

Энергетика министрлігінің мәліметінше, 2026 жылы электр станцияларында 9 энергоблок, 55 қазандық және 51 турбина жөнделуі тиіс. Қазірдің өзінде 3 энергоблок, 33 қазандық және 24 турбина бойынша жұмыстар жүргізіліп жатыр.

Электр желілерінде де жөндеу қарқыны жоғары. Өңірлік электр желілері компаниялары жыл соңына дейін 17,1 мың шақырым электр беру желісін және 444 қосалқы станцияны жөндеуді жоспарлаған. Тамыздың соңына қарай желілердің 91%-ы және қосалқы станциялардың 84%-ы бойынша жұмыстар аяқталды.

Энергия жүйесінің тұрақтылығында да оң өзгеріс бар. 2026 жылдың алғашқы жеті айында электр станцияларындағы технологиялық бұзушылықтар саны 5,6%-ға азайған.

Жөндеу жұмыстарының негізгі мақсаты — энергетикалық инфрақұрылымның сенімділігін арттырып, алдағы жылыту маусымын тұрақты өткізу.

Дереккөз: Ranking.kz