2026 жылдың қаңтар-мамыр айларында Қазақстанда орындалған құрылыс жұмыстарының көлемі 2,4 трлн теңгені құрап, өткен жылдың сәйкес кезеңімен салыстырғанда 13,4%-ға өсті.

Ұлттық статистика бюросының мәліметінше, өсімге негізінен ғимараттар құрылысы көлемінің 41,2%-ға артуы және құрылыс пен жөндеу жұмыстарының жандануы ықпал еткен.

Құрылыс жұмыстарының құрылымында көлік инфрақұрылымы басым бағыттардың бірі болып қалуда. Атап айтқанда, автомобиль жолдары, теміржолдар және метро құрылысының үлесі жалпы көлемнің 26,3%-ын құрады. Тұрғын емес ғимараттар құрылысының үлесі 20,4%, ал тұрғын үй құрылысы 11,9% болды.

Саладағы негізгі жұмыстарды жеке сектор атқарды. Есепті кезеңде құрылыс жұмыстарының 87,9%-ын жеке құрылыс ұйымдары орындаған. Шетелдік компаниялардың үлесі 11,4%-ды құраса, мемлекеттік ұйымдардың үлесі небәрі 0,7% болды.

Құрылыс саласындағы оң динамика елдегі инвестициялық белсенділіктің сақталып отырғанын және инфрақұрылымдық жобаларды іске асыру қарқынының жоғары екенін көрсетеді.