Қазақстан мен Еуропалық одақ арасында виза тәртібін жеңілдету жөніндегі келіссөздер соңғы кезеңге шықты. Бұл туралы Қазақстанның ЕО-дағы елшісі Роман Василенко мәлімдеді.

Оның айтуынша, тараптар виза рәсімдерін жеңілдету және реадмиссия туралы келісімдер бойынша келіссөздерді аяқтауға жақын. Құжаттар күшіне енген жағдайда Қазақстан азаматтарының Еуропа елдеріне сапарлау мүмкіндіктері кеңейіп, виза алу рәсімі анағұрлым ыңғайлы болмақ.

Алайда бұл келісім Қазақстан мен Еуропалық одақ арасында визасыз режим енгізуді көздемейді. Әңгіме Шенген визасын алу тәртібін жеңілдету туралы болып отыр.

Келісім шеңберінде құжаттар тізімін қысқарту, өтінімдерді қарау мерзімін жеделдету және консулдық алымдарды төмендету қарастырылған. Сонымен қатар студенттер, кәсіпкерлер, журналистер, ғылыми қауымдастық өкілдері және ЕО азаматтарының жақын туыстары үшін виза рәсімдеу шарттары жеңілдетілуі мүмкін.

Сарапшылардың пікірінше, мұндай қадам іскерлік байланыстарды нығайтуға, туризм ағынын арттыруға және білім беру мен мәдени ынтымақтастықты дамытуға ықпал етеді.

Осылайша, қазақстандықтар үшін Еуропа елдеріне бару кезінде виза талаптары сақталғанымен, оны алу рәсімі жеңілдеп, уақыт пен қаржы шығындарын азайтуға мүмкіндік береді.