Қазақстан IT-секторды қолдау шараларын ұзақ мерзімге сақтауды көздеп отыр. Жасанды интеллект және цифрлық даму министрлігі Astana Hub қатысушыларына арналған қолдау тетіктерін 2045 жылға дейін ұзарту мүмкіндігін қарастыруда.

Ведомствоның мәліметінше, бастама экономиканы цифрлық трансформациялау стратегиясы аясында жүзеге асырылуда. Оның мақсаты – Қазақстанның өңірлік IT-хаб ретіндегі позициясын нығайтып, технологиялық компаниялар үшін болжамды әрі бәсекеге қабілетті бизнес-орта қалыптастыру.

Министрлік ұзақ мерзімді жоспарлау кезінде жасанды интеллект саласындағы жаһандық трендтерді, IT-қызметтер экспортының өсу әлеуетін және жоғары технологиялық инвестицияларды тарту қажеттілігін ескеріп отырғанын атап өтті.

Бүгінде Astana Hub экожүйесінде 2 268 компания тіркелген. Хаб аясында 35 мың жоғары білікті жұмыс орны құрылып, 438 млрд теңге инвестиция тартылған. Ал қазақстандық IT-шешімдердің экспорты 1,9 млрд АҚШ долларына жеткен.

Министрліктің мәлімдеуінше, қазіргі уақытта сарапшылар қауымдастығымен және мемлекеттік органдармен бірлесіп қолданыстағы қолдау тетіктеріне талдау жүргізіліп жатыр. Негізгі назар инновациялық экожүйені дамытуға, адами капиталды нығайтуға және жасанды интеллект технологияларын енгізуге аударылады.

Ведомствода Astana Hub-ты дамытудың ұзақ мерзімді стратегиясы Қазақстанды технологиялық бизнес үшін әлемдегі ең тартымды юрисдикциялардың біріне айналдыруға бағытталғанын атап өтті.