Әлеуметтік желілерде тараған алаяқтар рәсімдеген кредиттер есептен шығарылады деген ақпарат шындыққа сәйкес келмейді. Бұл туралы Қаржы нарығын реттеу және дамыту агенттігі ресми түрде мәлімдеді.

Ведомство азаматтардың құқықтарын қорғау шараларын тұрақты негізде қабылдап жатқанын хабарлады. Атап айтқанда:

• 2024 жылдың 20 тамызынан бастап тергеу жүргізілген кезеңде кредиторлар сыйақы есептеуді және сотқа дейінгі талап ету жұмыстарын тоқтатуға міндетті;

• «Стоп-кредит» қызметі белсенді болған кезде заңсыз рәсімделген кредиттерді 2024 жылдың 1 қыркүйегінен бастап кешіру міндеттелген;

• Егер сот шешімімен қарыз алушының қатысуынсыз рәсімделгені анықталса, кредиттік міндеттемелер тоқтатылады.

Қазіргі таңда Парламент Сенатында қаржы алаяқтығына қарсы қосымша заңнамалық өзгерістер қарастырылып жатыр. Олар онлайн-кредиттеу кезінде 24 сағаттық «суыту» мерзімін, биометриялық тексеруді, және SIM-карталарды шектеуді қамтиды.

Антифрод-орталықтың жұмысы күшейтіліп, оған ұялы байланыс операторлары, құқық қорғау және арнайы органдар қосылмақ.

Ал алаяқтықпен айналысты деген күдікке ілінген алты МҚҰ-ға қатысты тергеу жүріп жатыр, олардың кейбірі лицензиясынан айырылды.