Қазақстанның Энергетика министрлігі халықты табиғи газбен қамту деңгейін 80%-ға жеткізуге арналған кешенді Жол картасын әзірлеуге кірісті. Бұл жұмыс Мемлекет басшысы Қасым-Жомарт Тоқаевтың елді газдандыру қарқынын жеделдету жөніндегі тапсырмасын орындау аясында жүргізілуде.

Жаңа құжат газ инфрақұрылымын кеңейту бойынша кезең-кезеңімен жүзеге асырылатын шараларды айқындап, осы саладағы мемлекеттік саясатты іске асырудың негізгі стратегиялық құралына айналады.

Елімізді газдандыру жұмыстары азаматтардың өмір сүру сапасын арттыруға, өңірлерді дамытуға және энергетикалық қауіпсіздікті нығайтуға бағытталған 2035 жылға дейінгі Бас схема аясында жүзеге асырылып жатыр.

Энергетика министрлігінің мәліметінше, 2025 жылы газбен жабдықтау бойынша 84 жоба іске асырылды. Соның нәтижесінде 94 елді мекеннің 354 мыңнан астам тұрғыны табиғи газға қол жеткізді. Бір жыл ішінде шамамен 2 мың шақырым газ тарату желілері салынды.

Нәтижесінде табиғи газға қолжетімді халық саны 20,5 миллион тұрғынның 13,1 миллионына жетті. Ал 2026 жылы газ тасымалдау инфрақұрылымын дамыту жобалары тағы 36 мың адамды табиғи газбен қамтуға мүмкіндік береді.

Ведомствоның айтуынша, жаңа Жол картасын іске асыру газдандыру қарқынын жеделдетіп, халықтың табиғи газға қолжетімділігін кеңейтуге және өңірлердің әлеуметтік-экономикалық дамуына қосымша серпін беруге мүмкіндік береді.