2021 жылдан бастап жүзеге асып келе жатқан цифрлық трансформация мемлекеттік басқарудың тиімділігін арттыруға, әкімшілік және сыбайлас жемқорлық кедергілерді азайтуға, сондай-ақ азаматтар мен бизнеске көрсетілетін қызметтердің сапасын жақсартуға бағытталған.

Цифрлық шешімдер көлеңкелі экономикадан 28 млрд теңгеден астам қаражатты шығаруға, 13 млрд теңгеден астам бюджет қаражатын үнемдеуге мүмкіндік берді. Жалпы тиімділік 51,3 млрд теңгеге жетті. Мемлекеттік қызметтерді көрсету мерзімі 20 есеге қысқарды. Сыбайлас жемқорлық тәуекелдері айтарлықтай төмендеді.

Салаларды цифрлық трансформациялау аясында QazTech ұлттық платформасы іске қосылды. Ол цифрлық өнімдерді жедел әзірлеуге арналған және жаңа ІТ-шешімдерді енгізу мерзімін бұрынғы 1,5-3 жылдан 6 айға дейін қысқартуға мүмкіндік береді.

Қазіргі таңда QazTech базасында мемлекеттік органдардың бірыңғай интернет-порталы, Smart Bridge жүйесі және Ұлттық экологиялық деректер қоры жұмыс істеп тұр.

«Қазақстан цифрландыру бойынша әлемдегі 193 елдің ішінде 24-орында тұр. Ал онлайн қызметтер индексі бойынша топ он елдің қатарына кіреді. Қазір мемлекеттік қызметтердің 92 пайызын онлайн алуға болады», – деді цифрлық даму, инновация және аэроғарыш өнеркәсібі министрі Жаслан Мәдиев.