Астанада, Назарбаев орталығында, халықаралық ғылыми жобалар, инновациялар мен технологиялар конкурстарының жеңімпаздары – мектеп оқушыларына арналған IV Халықаралық ғылыми форум (ISF4Child) өтті.

Форум «Ғылымдағы балалар» жобасы аясында Private Institution International Centre of Scientific Collaborations (ICSC) бастамасымен Қазақстан Республикасы Ғылым және жоғары білім министрлігінің, Ұлттық зияткерлік меншік институтының (Qazpatent) қолдауымен, сондай-ақ Нұрсұлтан Назарбаев Қоры, Тұңғыш Президент музейі, Астана қаласының Білім басқармасы, «Астана дарыны» орталығы, «Бір белдеу – бір жол» халықаралық ғылыми-білім беру консорциумы (BRISEC) және еліміздің бірқатар ғылыми институттарымен бірлесіп ұйымдастырылды.

Форумға 500-ге жуық қатысушы жиналды. Олардың қатарында халықаралық ғылыми байқаулардың жеңімпаздары – мектеп оқушылары, жетекші университеттердің студенттері, ғалымдар, педагогтар және Қазақстан, Қырғызстан мен Тәжікстаннан келген халықаралық сарапшылар бар. Іс-шара ғылыми білім беруді дамытуға және заманауи технологиялар мен жасанды интеллект саласында құзыреттерге ие жаңа буын зерттеушілерді қалыптастыруға бағытталған жүйелі жұмыстың жалғасы болды.

Форумның негізгі ұйымдастырушысы – Global Council for Science Education (IAP SEP) мүшесі және халықаралық ғылыми сарапшылар қауымдастықтарының мүшесі Ләззат Құсайынова негізін қалаған International Centre of Scientific Collaborations (ICSC) жеке мекемесі. Орталық 2022 жылдан бері «Ғылымдағы балалар» жобасын жүзеге асырып келеді және ғылыми сауаттылықты дамытуға, мектеп оқушыларын халықаралық конкурстарға дайындауға, сондай-ақ Қазақстанда ғылыми білім берудің тұрақты экожүйесін қалыптастыруға бағытталған.

«Бүгін біз әлемнің қаншалықты жылдам өзгеріп жатқанын көріп отырмыз. Біздің міндетіміз – балаларды болашаққа дайындау ғана емес, оларды сол болашақты қалыптастыратын тұлғаларға айналдыру. Бұл форум – жетістіктерді көрсететін алаң ғана емес, сонымен қатар жаһандық деңгейде ойлай алатын, технологиялармен жұмыс істейтін және қоғам дамуына жауапкершілік алатын жаңа буын зерттеушілер қалыптасатын орта. Біз үшін қазақстандық мектеп оқушыларының халықаралық ғылыми қауымдастыққа сенімді түрде кірігіп, оның толыққанды мүшесіне айналып келе жатқаны маңызды», – деп атап өтті Л. Құсайынова.

Форумды өткізу адами капиталды дамытуға, дарынды жастарды қолдауға және елдің зияткерлік әлеуетін нығайтуға бағытталған стратегиялық бастамалардың сабақтастығын көрсетті. Осы тұрғыда Нұрсұлтан Назарбаев Қорының қатысуы бәсекеге қабілетті ұрпақты қалыптастырудағы жүйелі жұмыстың маңызын және Қазақстанды жаһандық ғылыми-білім беру кеңістігінде ілгерілетуді айқындады.

Форум Қазақстанда жарияланған Цифрландыру және жасанды интеллект жылы аясында өтті. Осыған байланысты оның негізгі тақырыбы – «Жасанды интеллект негізіндегі STEM-білім беру» болды. Іс-шараның күн тәртібі мектеп оқушыларының ғылыми құзыреттерін дамытуға, ғылымды дәріптеуге және 2025–2026 жылдардағы халықаралық ғылыми байқауларда жоғары нәтижелерге қол жеткізген қазақстандық оқушылардың жетістіктерін көрсетуге бағытталды.

Форум жұмысына ғылым, білім беру және халықаралық сарапшылар қауымдастығының жетекші өкілдері қатысты. Құттықтау сөздермен және баяндамалармен Қазақстан Республикасы Ғылым және жоғары білім министрі Саясат Нұрбек, Астана қаласы Білім басқармасының басшысы Қасымхан Сеңгазиев, Нұрсұлтан Назарбаев Қорының өкілдері, сондай-ақ халықаралық сарапшылар – BRISEC президенті, Қытай ғылым академиясының академигі Хянг Пинг Ву, BRISEC вице-президенті Манзура Хусейн Сомро және WICO мен ICPC халықаралық ғылыми конкурстарының президенті, профессор Ли Джу Хен сөз сөйледі.

Үш күндік бағдарлама аясында форумның салтанатты ашылуы, пленарлық отырыстар және мектеп оқушыларының ғылыми жобаларының таныстырылымдары өтті. Қатысушылар жасанды интеллект, экология, инженерия және биотехнология салаларындағы әзірлемелерін ұсынып, ғылыми идеяларды қолданбалы шешімдер мен технологиялық стартаптарға айналдыру мәселелерін талқылады.

Форумның екінші күні практикалық жұмысқа арналды. Қатысушылар Астананың жетекші университеттеріне, соның ішінде Nazarbayev University, Coventry University және Maqsut Narikbayev University оқу орындарына ғылыми турларға қатысады. Білім беру бағдарламасы аясында жасанды интеллект, инженерия, академиялық жазу және робототехника бойынша шеберлік сабақтары өткізіліп, оқушылардың қолданбалы дағдыларын дамытуға және оларды заманауи технологиялық үдерістерге тартуға бағытталды.

Қорытынды күн PRO.NRG.FEST ғылыми-танымдық фестивалі аясында өтеді. Мұнда мектеп оқушылары ғылымды дәріптеудің заманауи форматтарымен танысып, дәрістерге, ғылыми көрсетілімдерге және білім беру бағдарламаларына қатысады. Бағдарламалар ғылым мен технологиялардың іргелі және қолданбалы бағыттарын қамтиды.

Форум дәстүрлі түрде Қазақстан ғылым қызметкерлері күні қарсаңында өткізіледі. 2026 жылы ол маңызды мерейтойлық даталарға, соның ішінде Қазақстан Республикасы Ұлттық ғылым академиясының 80 жылдығына және «Belt and Road» Teenager Maker Camp and Teacher Workshop халықаралық бағдарламасының 10 жылдығына орайластырылды.

Астанада өткен IV Халықаралық мектеп оқушыларының ғылыми форумы Қазақстанның ғылыми білім беру мен халықаралық ынтымақтастық орталығы ретіндегі рөлінің артып келе жатқанын тағы бір мәрте дәлелдеді, сондай-ақ жаһандық технологиялық трансформация жағдайында талантты жастарды жүйелі қолдаудың маңыздылығын айқындады.