2025 жылдың қаңтар-наурыз айларында қазақстандықтар жаңа жеңіл автокөліктерге орташа 15,7 млн теңге жұмсады. Бұл 2024 жылдың сәйкес кезеңімен салыстырғанда 2,9%-ға төмен (16,2 млн теңге).

Қазақстандық автомобиль одағының (ҚАО) мәліметінше, отандық автоөндірушілер мен ресми дистрибьюторлар халықаралық автоконцерндермен тікелей келісімшарттар жасаған. Бұл оларға жаһандық экономикалық дағдарыстар мен геосаяси өзгерістер жағдайында да тұрақты автокөлік жеткізілімдерін қамтамасыз етуге мүмкіндік береді.

2024 жылы Қазақстанда 205,1 мың жаңа автокөлік сатылды. Оның 66% - отандық өндіріс, ал 34% - импорттық автомобильдер.

Сондай-ақ, елде көлік қауіпсіздігіне қойылатын техникалық регламенттер бар, олар ресми импортталатын автокөліктерге қатаң талаптар қояды. Мысалы, АҚШ, Қытай және басқа да кейбір елдердің нарығына арналған көліктер Қазақстанда сатылмайды, себебі олар елдің стандарттарына сәйкес келмейді.