Қазақстан Республикасының Қаржы нарығын реттеу және дамыту агенттігі микроқаржы қызметін лицензиялау қағидаларына өзгерістер енгізді. Жаңа талаптар 31 шілдеден бастап күшіне енеді және мемлекеттік қызмет көрсету процесін толықтай цифрлық Үкімет порталына көшіруді көздейді.

Енді микроқаржы ұйымдарын лицензиялаудың барлық түрлері цифрлық Үкіметтің веб-порталы арқылы жүзеге асырылады. Сонымен қатар көрсетілетін мемлекеттік қызметтің мәртебесі мемлекеттік қызметтерді мониторингтеу жүйесінде автоматты түрде жаңартылып отырады.

Тағы бір маңызды өзгеріс – өтініш беруші ұсынатын құжаттар саны қысқарады. Агенттік қажетті мәліметтердің бір бөлігін мемлекеттік цифрлық жүйелерден өздігінен алады. Атап айтқанда, жеке басты куәландыратын деректер, соттылығының жоқтығы туралы ақпарат және заңды тұлғаның мемлекеттік тіркелуі жөніндегі мәліметтер сұратылады.

Лицензия алу үшін ұсынылатын құжаттар тізімі де жаңартылды. Өзгерістер жарғылық капиталдың ең төменгі мөлшерінің төленгенін растауға, ірі қатысушылар, ұйым басшылығы, қаржылық есептілік және өзге де құжаттарға қатысты талаптарды қамтиды. Шетел азаматтары мен заңды тұлғалар үшін ақпарат ұсынудың ерекше тәртібі қарастырылған.

Сонымен қатар лицензиялық алымдардың мөлшері өзгеріссіз қалды:

• лицензия беру – 30 АЕК;

• лицензияны қайта рәсімдеу – лицензия құнының 10%-ы;

• лицензияның телнұсқасын беру – белгіленген мөлшерлеменің 100%-ы.

Осыған ұқсас өзгерістер коллекторлық агенттіктерді есептік тіркеу қағидаларына да енгізілді. Құжаттарда «электрондық үкімет» термині «цифрлық Үкімет», ал «ақпараттық жүйелер» ұғымы «цифрлық жүйелер» терминімен ауыстырылды.