ҚР Ғылым және жоғары білім министрі Саясат Нұрбек Орыс тілі жөніндегі халықаралық ұйымның Бас хатшысы Наталья Бочаровамен кездесті.

Тараптар білім беру саласындағы өзара іс-қимылдың өзекті бағыттарын талқылап, педагог кадрларды даярлау сапасын арттыру және тілдерді оқыту әдістемесін жетілдіру бойынша пікір алмасты.

Кездесу барысында педагогикалық жоғары оқу орындарындағы білім беру бағдарламаларын жаңарту, орыс тілін оқыту әдістемесін жетілдіру және білім беру мазмұнын дамыту мәселелеріне назар аударылды. Бұл бағытта халықаралық тәжірибені зерделеу, сарапшылар арасында пікір алмасу және тиімді әдістемелік тәсілдерді енгізу маңызды екені атап өтілді.

Педагогтердің кәсіби біліктілігін арттыру мәселесі

Сонымен қатар педагогтердің кәсіби біліктілігін арттыру, әдістемелік әлеуетті күшейту және жетекші педагогикалық жоғары оқу орындарымен тәжірибе алмасу мүмкіндіктері қарастырылды.

Атап айтқанда, Абай атындағы Қазақ ұлттық педагогикалық университеті және басқа да бейінді жоғары оқу орындарымен кәсіби байланыстарды одан әрі дамыту ұсынылды.

Кездесу қорытындысы бойынша тараптар білім беру және әдістемелік бағыттарда тәжірибе алмасуды жалғастыруға, сараптамалық байланыстарды нығайтуға және бірлескен жобаларды іске асыру мүмкіндіктерін қарастыруға мүдделі екенін білдірді.