Қазақстан халқының инфляциялық күтулерінде оң өзгеріс байқалады. Ұлттық банктің тапсырысы бойынша FusionLab жүргізген жаңа сауалнамаға сәйкес, тамызда баға өсімінің баяулауын күтетін респонденттердің үлесі 9,7%-ға жетті. Шілдеде бұл көрсеткіш 9,5% болған.

Сонымен қатар инфляция қарқыны жеделдейді деп есептейтіндердің үлесі де айтарлықтай төмендеді — 28,2%-дан 24,6%-ға дейін.

Өткен кезеңдегі инфляцияны бағалау көрсеткіштері де жақсарған. Төртінші ай қатарынан соңғы 12 айда баға бұрынғыдан жылдамырақ өсті деп санайтын қазақстандықтардың үлесі азайып келеді. Сәуірде бұл пікірді сауалнамаға қатысқандардың 58%-ы білдірсе, тамызда көрсеткіш 47,7%-ға дейін төмендеген.

Дегенмен алдағы бір жылға арналған инфляциялық болжамдар әлі де кең ауқымда қалып отыр. Респонденттер ең жиі 7%-дан 20%-ға дейінгі аралықты атаған, мұндай жауаптар барлық сауалнама қатысушыларының шамамен үштен бірін құрады. Ал сауалнамаға қатысқандардың жартысына жуығы инфляцияның болашақтағы деңгейін бағалауда қиналған.

Инфляциялық күтулер Ұлттық банк үшін маңызды көрсеткіштердің бірі саналады және ол базалық мөлшерлеме бойынша шешім қабылдау кезінде ескеріледі.