Қазір елімізде жалпы ұзындығы 4 900 шақырым 26 ақылы жол учаскесі жұмыс істейді. Жолдарда ақаулар анықталған жағдайда жол жүру ақысын уақытша тоқтату нормасы енгізілген. Қазіргі кезде 15 учаскеде жарықтар мен өзге де ақауларды жою жұмыстары жүргізіліп жатыр.
Бұл туралы «ҚазАвтоЖол» ҰК» АҚ басқарма төрағасы Дархан Иманашев Орталық коммуникациялар қызметі алаңында өткен баспасөз мәслихатында мәлімдеді.

– Биыл қосымша 6 жаңа ақылы жол учаскесін енгізу жоспарланып отыр, – деді төраға.

Сондай-ақ брифинг барысында Дархан Иманашев жол қызметтері биылғы су тасқыны кезеңінен алдын ала жүргізілген дайындық жұмыстарының арқасында сәтті өткенін атап өтті. 2026 жылғы су тасқыны кезінде республикалық автожолдарда 5 су басу фактісі тіркелсе, екі жыл бұрын мұндай жағдайлар саны 178 болған.

Су тасқынына қарсы іс-шараларды жүргізуге шамамен 1000 бірлік техника мен 1900 қызметкер жұмылдырылды. Сонымен қатар 15 мыңға жуық су өткізу құбыры тазартылып, 86 мың текше метр инертті материал дайындалды.