Қыркүйек айы Қазақстан халықаралық биржасы AIX үшін тарихи көрсеткішпен аяқталды. Ай қорытындысы бойынша сауда көлемі $562 млн, немесе 250,2 млрд теңге болып, биржаның бүкіл тарихындағы ең жоғары айлық нәтижеге жетті.

Сауда белсенділігінің негізгі драйверлерінің бірі Solidcore акциялары болды. Қыркүйек айында компанияның акцияларымен жасалған мәмілелер көлемі $66,5 млн құрады. Бұл ретте 22 сауда күнінің 21 күнінде күнделікті сауда айналымы $1 млн-нан асты.

Мұндай динамика инвесторлардың жекелеген қазақстандық эмитенттерге қызығушылығы артып, акциялар нарығындағы өтімділіктің жоғарылап келе жатқанын көрсетеді.

AIX қарыз капиталын тарту алаңына айналып келеді

Акциялармен операциялардан бөлек, биржа қарыздық қаржыландыру нарығындағы позициясын да біртіндеп күшейтіп келеді. AIX арқылы қазақстандық компаниялар мен мемлекеттік құрылымдардың қытай юанімен номинацияланған облигациялары листингтен өтуде.

Атап айтқанда, биржада Қазақстанның Даму Банкі мен «ҚазМұнайГаздың» димсам-облигациялары, сондай-ақ «Самұрық-Қазына» мен Қаржы министрлігінің панда-облигациялары ұсынылған.

Батыс нарықтарындағы қарыз алу құнының жоғары болуы жағдайында Азияның капитал нарықтарына шығу өзекті бола түсті. Қытай мен Гонконгтағы салыстырмалы түрде төмен пайыздық мөлшерлемелер қазақстандық қарыз алушыларға қаржыландыру көздерін әртараптандыруға қосымша мүмкіндік береді.

Биржа ірі жобаларды қаржыландыруға қатысады

AIX арқылы ауқымды өнеркәсіптік және инфрақұрылымдық жобаларды іске асыруға қаражат тартылуда.

Қарыздық қаржыландыру ұйымдастырылып жатқан жобалардың қатарында Ақтауда аммиак-карбамид зауытын салу, Батыс Қазақстанда калий тұздарын өндіру және өңдеу кәсіпорнын іске қосу, сондай-ақ Қарағанды облысындағы «Кармет» инфрақұрылымын жаңғырту бар.

Сонымен қатар биржалық құралдар арқылы Көкшетау ЖЭО-сын, Атырау облысында бутадиен өндіретін зауытты және Бейнеу — Бозой — Шымкент газ құбырының екінші тармағын салу жобалары қаржыландырылуда.

Осылайша биржалық инфрақұрылым бағалы қағаздар нарығындағы операциялармен қатар, экономиканың нақты секторына капитал тартудың маңызды арналарының біріне айналып келеді.

AIX исламдық қаржыландыруды кеңейтуде

Биржаның тағы бір даму бағыты — исламдық қаржы нарығы. Қазіргі уақытта AIX алаңында сукук шығаратын үш корпоративтік эмитент бар. Сукук — исламдық қаржыландыру қағидаттарына сәйкес келетін бағалы қағаздар.

Сонымен қатар биржада алғашқы шетелдік эмитенттің шығуына дайындық жүріп жатыр. Оның AIX-ке шығуы қазақстандық нарықтағы қаржы құралдарының қатарын кеңейтіп, шариғат қағидаттарына сәйкес келетін өнімдерге қызығушылық танытатын жаңа инвесторларды тартуға мүмкіндік береді.

AIX капитал нарығындағы позициясын нығайтып келеді

Қыркүйектегі рекордтық сауда көлемі, жекелеген компаниялардың акцияларына жоғары сұраныс, юаньмен қарыз тарту құралдарының кеңеюі және сукук нарығының дамуы AIX рөлінің өзгеріп келе жатқанын көрсетеді.

Биржа компаниялар мен мемлекеттік құрылымдарға ішкі инвесторлармен қатар халықаралық капиталға да қол жеткізуге мүмкіндік беретін алаңға айналып келеді. Бұл ретте тартылған қаражат өнеркәсіп, энергетика, көлік және коммуналдық инфрақұрылым жобаларына бағытталуда.

Капитал тарту құралдарының кеңеюі жағдайында AIX Қазақстан экономикасын қаржыландыру көздерін әртараптандыруда барған сайын маңызды рөл атқара алады.