Yessenov University AI-Sana ұлттық бағдарламасы аясында мұнай-газ саласына арналған өнеркәсіптік мониторингтің отандық жүйесін әзірлеуде. Жоба Мемлекет басшысының жасанды интеллектіні дамыту және цифрлық экономикаға арналған кадрларды даярлау жөніндегі тапсырмаларын іске асыру шеңберінде жүзеге асырылып жатыр.

Жоба университет пен «Мұнайтелеком» компаниясының бірлескен жұмысының нәтижесі болып табылады. Қазіргі таңда мамандар LoRaWAN технологиясын қолдайтын отандық бағдарламаланатын логикалық контроллерді (PLC) әзірлеуде. Ол мұнай-газ нысандарын, өнеркәсіптік инфрақұрылымды және экологиялық жүйелерді қашықтан бақылауға мүмкіндік береді.

Жаңа жүйе мұнай ұңғымаларынан, сорғы станцияларынан, түрлі датчиктер мен есепке алу құрылғыларынан деректерді жинап, оларды SCADA және технологиялық процестерді автоматтандырылған басқару жүйелеріне біріктіреді. Бұл өндірістік процестерді нақты уақыт режимінде бақылауға жағдай жасайды.

Жобаның негізгі әзірлеушілерінің бірі Ескендір Қыдырбаев тәжірибелік-өнеркәсіптік сынақтарды ұйымдастыруға, автоматтандыру саласындағы шешімдерді әзірлеуге және құрылғының инженерлік-дизайн тұжырымдамасын жасауға жауап береді.

Жоба тек өнеркәсіппен шектелмейді. Жүйе Каспий теңізінің экологиялық жағдайын бақылауға да пайдаланылмақ. LoRaWAN желісіне қосылған датчиктер су температурасы, тұздылық, рН деңгейі, лайлылық және басқа да экологиялық көрсеткіштер туралы мәліметтерді жедел жинауға мүмкіндік береді.

Қазіргі уақытта университеттің инженерлік командасы құрылғының тәжірибелік үлгілерін дайындап, оларды тәжірибелік-өнеркәсіптік сынақтан өткізу кезеңіне кірісті.

Мамандардың айтуынша, бұл бастама мұнай-газ кешенін цифрландыруды жеделдетіп, жоғары технологиялық өнімдердің отандық өндірісін дамытуға, импортты алмастыруға және Қазақстанның технологиялық тәуелсіздігін нығайтуға ықпал етеді.