Қазақстан банктері биржадан тыс нарықтағы доллар операциялары бойынша рекорд орнатты. 2026 жылғы қазанда америкалық валютаны сатып алу көлемі 40,8 млрд долларды, ал сату көлемі 40,7 млрд долларды құрады. Бұл туралы Бірінші кредиттік бюро Ұлттық банктің деректеріне сілтеме жасап хабарлады.

Долларды сатып алу көлемі екінші ай қатарынан 40 млрд доллардан асып отыр. Ал сату көлемі бақылау кезеңінде алғаш рет осы межеден жоғарылады.

Операциялардың басым бөлігі шетелдік банктермен жасалған мәмілелерге тиесілі. Олардың үлесі жалпы көлемнің 86%-ын құрады. Қалған 14%-ы резидент банктермен жүргізілген операцияларға тиесілі.

Валюта нарығындағы жоғары белсенділік 2025 жылғы қазаннан бері, яғни 13 ай қатарынан сақталып келеді. Осы кезеңдегі операциялардың орташа айлық көлемі 34,8 млрд доллар болды.

Сонымен бірге рекордтық айналым банк секторы долларды жаппай жинақтап жатыр дегенді білдірмейді. Сатып алу мен сату көлемдері бір-біріне өте жақын: қазандағы айырмашылық небәрі 100 млн долларды құрады.

Демек, бұл жағдай банктердің долларды таза сатып алу көлемінің айтарлықтай өскенін емес, валюта операцияларының қарқындылығы артқанын көрсетеді.