Қазақстанда кальянханаларды лицензиялау бюджетке шамамен 50 млрд теңге көлемінде қосымша кіріс түсіруі мүмкін. Бұл туралы Қаржы министрі Мәди Такиев Мәжіліс кулуарында журналистердің сұрақтарына жауап беру кезінде мәлімдеді.

Министрдің айтуынша, Қаржы министрлігі кальян бизнесін лицензиялау бастамасын қолдайды. Ведомство өкілдерінің пікірінше, қазіргі тыйымға қарамастан, кальян қызметін көрсететін орындар жұмысын жалғастырып келеді. Сондықтан бұл саланы заң аясында реттеп, лицензиялық төлемдер арқылы бюджет кірісін арттыру тиімді болмақ.

«Қазір кальяндарға тыйым салынғандықтан, олардың нақты санын анықтау қиын. Дегенмен біз оларды лицензиялау қажет деп есептейміз. Өйткені бұл қызмет түрі бәрібір жұмыс істеп тұр. Сондықтан мемлекет лицензиялық төлемдер арқылы бюджетке қосымша түсім алуы керек», – деді Мәди Такиев.

Оның сөзінше, кальян қызметін заңдастыру және лицензиялау жөніндегі заң жобасы әзірге талқылау және пысықтау кезеңінде тұр.

Қаржы министрлігінің алдын ала есептеулеріне сәйкес, тиісті норма қабылданған жағдайда бюджетке жыл сайын шамамен 50 млрд теңге көлемінде қосымша қаражат түсуі мүмкін.

Ведомство бұл бастаманы көлеңкелі экономиканың көлемін қысқарту, кәсіпкерлік қызметті ашық алаңға шығару және бюджет кірістерін ұлғайту тетіктерінің бірі ретінде қарастырып отыр.