Құрылтай Еуразиялық экономикалық одақ (ЕАЭО) туралы шартқа өзгерістер енгізу жөніндегі хаттаманы ратификациялау туралы заңды екі оқылымда қабылдады. Құжат құқықтық олқылықтарды жоюға, реттеу тетіктерін жетілдіруге және одаққа мүше мемлекеттер арасындағы экономикалық ынтымақтастықты нығайтуға бағытталған 30-ға жуық түзетуді қамтиды.

Мемлекеттік сатып алуға қатысу жеңілдейді

Маңызды жаңашылдықтардың бірі – мемлекеттік сатып алу рәсімдерінде банктік кепілдіктерді өзара тану тетігін енгізу.

Бұл ЕАЭО елдерінің кәсіпорындарына одаққа мүше басқа мемлекеттердің мемлекеттік сатып алуларына қатысқан кезде әр елде қосымша қаржылық кепілдік рәсімдемей-ақ жұмыс істеуге мүмкіндік береді.

Жаңа ережелер әкімшілік кедергілерді азайтып, трансшекаралық тендерлерге қатысуды жеңілдетеді және бизнес үшін қосымша мүмкіндіктер ашады деп күтілуде.

Тағы қандай өзгерістер енгізіледі?

Түзетулер экономикалық интеграцияның бірнеше маңызды бағытын қамтиды.

Атап айтқанда, Еуразиялық экономикалық комиссияның (ЕЭК) одақтың ішкі нарығындағы кедергілерді анықтау және жою жөніндегі өкілеттіктерін кеңейту көзделген.

Өзгерістердің жеке бөлігі энергетика саласына қатысты. Ортақ электр энергиясы нарығын реттеу тетіктерін жетілдіру және оның жұмыс тиімділігін арттыру жоспарланып отыр.

Сонымен қатар, құжат техникалық регламенттерді біріздендіруді қарастырады. Бұл ЕАЭО мемлекеттерінде өнімнің сапасы мен қауіпсіздігіне қойылатын бірыңғай талаптарды қолдануға ықпал етеді.

Түзетулер көліктік бақылауды жетілдіруге, сондай-ақ бәсекелестік пен инвестициялық қызмет салаларындағы ашықтықты арттыруға бағытталған.

Осылайша, қабылданған өзгерістер ЕАЭО-ның ортақ нарығында кәсіпорындардың жұмысын жеңілдетуге, реттеуші шектеулерді азайтуға және одаққа мүше елдер арасындағы экономикалық ынтымақтастықты нығайтуға мүмкіндік береді.