Қазақстанда биылғы егін жинау науқаны қарқынды жүріп жатыр. 9 қыркүйектегі жағдай бойынша шаруалар 9,6 млн гектар дәнді дақыл алқабын жинап үлгерді. Бұл жалпы егіс көлемінің 61,6%-ына тең. Нәтижесінде 13,5 млн тонна астық бастырылды.

Биылғы көрсеткіш өткен жылдың осы кезеңімен салыстырғанда айтарлықтай жоғары. Астық қабылдау кәсіпорындарына түсім де бірнеше есеге артқан. Лицензияланған астық қабылдау ұйымдарына қазірдің өзінде 2,83 млн тонна астық жеткізілген. Былтыр дәл осы уақытта бұл көрсеткіш 552,7 мың тонна болған.

Алдын ала зерттеу нәтижелері жиналған жұмсақ бидайдың сапасы да жоғары екенін көрсетіп отыр. Тексерілген өнімнің 93%-ы азық-түлік мақсатындағы бидай санатына жатады. Оның ішінде 75%-ы – 3-сыныпты, 18%-ы – 4-сыныпты, тағы 7%-ы – 5-сыныпты және сыныпқа жатпайтын бидай.

Дән сапасының маңызды көрсеткіштерінің бірі – клейковина мөлшері. Зерттелген бидайдың 51%-ында клейковина деңгейі 28%-дан жоғары, 23,6%-ында 25–27%, ал 25,4%-ында 23–24% аралығында болған.

Бұдан бөлек, ел бойынша 6,3 млн тоннадан астам басқа ауыл шаруашылығы дақылдары жиналды. Оның ішінде 906,5 мың тонна майлы дақыл, 2,4 млн тонна көкөніс, 1,8 млн тонна бақша өнімі және 1,2 млн тонна картоп бар.

Егін жинау жұмыстарын уақытылы аяқтау үшін өңірлерде қажетті ресурстар да қамтамасыз етіліп жатыр. Атап айтқанда, орақ науқаны мен күзгі егіске 401,1 мың тонна дизель отыны бөлінді.

Минералды тыңайтқыштармен қамтамасыз ету мәселесі де бақылауда. Ауыл шаруашылығы саласының жылдық қажеттілігі 2,3 млн тоннаны құрайды. Қазіргі таңда оның 2 млн тоннасы немесе 85%-ы жөнелтілген.

Саладағы негізгі міндеттер – егінді белгіленген мерзімде жинап алу, алынған өнімді сақтап қалу, астық қабылдау сапасын қамтамасыз ету және елдің азық-түлік қорын жеткілікті деңгейде қалыптастыру.

Бұл жұмыстар ауыл шаруашылығы өндірісінің тұрақтылығын сақтап, Қазақстанның азық-түлік қауіпсіздігін қамтамасыз етуге бағытталған.