2026 жылғы 1 маусымдағы мәлімет бойынша Қазақстанның банк секторының активтері 73 трлн теңгеге жетіп, бір айда 2,3%-ға, жыл басынан бері 3,1%-ға өсті. Бұл туралы Ұлттық банктің статистикасында айтылған.

Банк секторындағы басты өзгеріс кредиттеу құрылымынан байқалды. Мамыр айында экономикаға берілген кредиттер көлемі 1,5%-ға өсіп, 41,3 трлн теңгені құрады. Оның ішінде корпоративтік кредиттер 2,9%-ға артып, 15,8 трлн теңгеге жетсе, халыққа берілген кредиттер небәрі 0,7%-ға өсіп, 25,5 трлн теңгені құрады.

Ең жоғары өсім ірі бизнеске тиесілі болды. Ірі компанияларға берілген кредиттер бір айда 6,6%-ға өсіп, 5 трлн теңгеге жетті. Ал шағын және орта бизнеске (ШОБ) берілген кредиттер жыл басынан бері 10,4%-ға ұлғайып, 7,5 трлн теңгені құрады.

Салалар бойынша өнеркәсіпке берілген кредиттер 5%-ға, құрылысқа 1,3%-ға, саудаға 0,8%-ға, ауыл шаруашылығына 0,4%-ға өсті. Көлік және байланыс салаларында ғана төмендеу тіркелді.

Мамырда банктер жалпы 3,1 трлн теңге көлемінде жаңа кредит берді. Оның 1,7 трлн теңгесі бизнеске тиесілі болды, бұл өткен жылмен салыстырғанда 10,3%-ға көп. Ал ШОБ субъектілеріне берілген жаңа кредиттердің көлемі бір жылда 33,5%-ға артты.

Сонымен қатар халықты кредиттеу өсімін сақтағанымен, қарқыны баяулады. Тұтынушылық кредиттер көлемі 17,1 трлн теңгеге, ипотекалық портфель 7,3 трлн теңгеге жетті.

Несиелердің құны жоғары деңгейде қалып отыр. Бизнеске теңгемен берілетін жаңа кредиттердің орташа мөлшерлемесі 22,3%, халыққа арналған кредиттер бойынша 21,4%, ал тұтынушылық несиелерде 23,2% болды.

Банк жүйесінің тұрақтылығы да сақталуда. Проблемалық кредиттердің (90 күннен астам мерзімі өткен) үлесі 4,2% деңгейінде қалды. Депозиттер көлемі 47,9 трлн теңгеге жетіп, жеке тұлғалардың салымдары 2,2%-ға өсті.

Сарапшылардың пікірінше, мамыр айындағы статистика банктердің кредит саясаты біртіндеп нақты экономикаға, әсіресе бизнес секторын қаржыландыруға бет бұра бастағанын көрсетеді.
Толығырақ: economykz.org