Қазақстанда отандық тауар өндірушілермен жасалған келісімшарттың жалпы көлемі 456 млрд теңгеге жетіп, 2024 жылмен салыстырғанда 16% өсті. Бұл туралы Мәжілісте өткен жиында Өнеркәсіп және құрылыс вице-министрі Олжас Сапарбеков мәлімдеді.  Вице-министрдің айтуынша, 2024 жылдың наурызында Үкімет жеңіл өнеркәсіп, машина жасау, жиһаз, металлургия, химия, қағаз және құрылыс салалары бойынша 4834-тен астам тауар позициясын бекітті.

Бұл тауарлар мемлекеттік сатып алу кезінде ұлттық режимнен алып тастау тізіміне енгізілген.

- Егер тізімге енген тауарларды сатып алу туралы конкурс жарияланса, ол ең алдымен қазақстандық тауар өндірушілер арасында өткізіледі. Бүгінгі таңда 2024 жылмен салыстырғанда отандық өндірушілермен жасалған шарттар саны 16%-ға артып, 456 млрд теңге болды, - деді вице-министр.
Сонымен қатар ол Үкімет отандық өндірісті одан ары қолдау және қазақстандық компаниялардың мемлекеттік сатып алуға қатысуын кеңейту мақсатында ұлттық режимнен алып тастау шараларының мерзімін ұзарту бойынша жұмыс жүргізіп жатқанын атап өтті.