Қазақстанда мерзімді әскери қызметке шақырылған азаматтарға банктік қарыздар мен микрокредиттер бойынша төлемді кейінге қалдыру мүмкіндігі автоматты түрде беріледі. Бұл туралы Қаржы нарығын реттеу және дамыту агенттігі (ҚНРДА) еске салды.

Төлемді кейінге қалдыру мерзімді әскери қызметтің бүкіл кезеңін және ол аяқталғаннан кейінгі 60 күнтізбелік күнді қамтиды. Осы уақыт аралығында негізгі борыш пен сыйақы бойынша төлемдер тоқтатылады. Сонымен қатар кейінге қалдыру кезеңінде несиеге сыйақы есептелмейді.

Жеңілдікті пайдалану үшін әскери қызметшілерге банкке немесе микроқаржы ұйымына (МҚҰ) жүгінудің, өтініш берудің, әскери комиссариаттан анықтама ұсынудың немесе несие шартына қосымша келісім жасасудың қажеті жоқ.

Азаматтың әскери қызметке шақырылғаны және қызметтен босатылғаны туралы мәліметтер Қорғаныс министрлігі, кредиттік бюролар мен қаржы ұйымдары арасындағы ақпараттық өзара іс-қимыл аясында кредиторларға автоматты түрде беріледі.

Әскерге шақырылғанға дейін мерзімі өткен берешек болса не болады?

Егер қарыз бойынша мерзімі өткен берешек әскери қызметке шақырылғанға дейін пайда болса, заңнамада көзделген жағдайларда мерзімді әскери қызмет өткеру кезеңінде берешекті өндіріп алу рәсімдері тоқтатыла тұрады.

Алайда бұл қарыздың есептен шығарылатынын білдірмейді. Сондықтан әскерге шақырылғанға дейін азаматтарға өздерінің кредиттік міндеттемелерін тексеріп, қажет болған жағдайда оларды реттеу шараларын қабылдау ұсынылады.

Әскери қызмет кезінде жаңа несие алуға бола ма?

2025 жылғы 31 тамыздан бастап Қазақстанда мерзімді әскери қызмет өткеріп жүрген азаматтарға жаңа банктік қарыздар мен микрокредиттер беруге тыйым салынған.

Банк немесе микроқаржы ұйымы өтінімді қарау кезінде әлеуетті қарыз алушының мәртебесін кредиттік бюро арқылы тексереді. Егер кредиттік есепте азаматтың мерзімді әскери қызмет өткеріп жүргені туралы ақпарат болса, қаржы ұйымы оған жаңа қарыз бермейді.

Қанша әскери қызметші төлемді кейінге қалдыру мүмкіндігін пайдаланды?

Қазақстанда төлемді кейінге қалдырудың автоматты тетігі 2024 жылғы тамыздан бастап қолданылады.

«Мемлекеттік кредиттік бюро» АҚ деректеріне сәйкес, 2024 жылғы тамыздан 2026 жылғы 1 маусымға дейін бұл мүмкіндік 82,1 мың әскери қызметшіге берілген. Жеңілдік қолданылған қарыздардың жалпы сомасы 23,5 млрд теңгені құрады.

2026 жылдың алғашқы жартыжылдығында 30 мың әскери қызметшіге жалпы сомасы 7,5 млрд теңге болатын қарыздар бойынша төлемді кейінге қалдыру мүмкіндігі ұсынылды.

Әскерге шақырылғанға дейін нені тексеру қажет?

ҚНРДА әскери қызметке аттанар алдында азаматтарға кредиттік есебін тексеруді ұсынады. Бұл барлық қолданыстағы қарыздар мен кредиттік міндеттемелер туралы мәліметтердің дұрыс көрсетілгеніне көз жеткізуге мүмкіндік береді.

Маңызды: төлемді кейінге қалдыру қарызды есептен шығаруды немесе кредиттік міндеттемелерден толық босатуды білдірмейді. Белгіленген мерзім аяқталғаннан кейін қарыз алушы несие шартына сәйкес төлемдерді қайта бастауы керек.

Қаржылық сауаттылық пен қарыз алушылардың құқықтарын қорғауға қатысты қосымша ақпаратты Fingramota.kz сайтынан алуға болады.