Мәскеуде Еуразиялық экономикалық одаққа (ЕАЭО) мүше мемлекеттердің энергетика саласындағы уәкілетті органдары басшылары кеңесінің 14-отырысы өтті. Кездесуде одақ аясындағы ынтымақтастықты нығайту және ортақ энергетикалық нарықтарды дамыту мәселелері талқыланды.

Отырысқа ЕАЭО-ға мүше мемлекеттердің энергетика министрлері қатысты. Күн тәртібіндегі негізгі тақырыптардың бірі газ, мұнай және мұнай өнімдерінің ортақ нарықтарын қалыптастыру, сондай-ақ электр энергиясының бірыңғай нарығын дамыту болды.

Қатысушылар ортақ энергетикалық нарықтардың жұмыс істеуіне қажетті нормативтік-құқықтық базаны жетілдіру мәселелерін қарастырды. Сонымен қатар мүше мемлекеттердің ұстанымдарын үйлестіруге және энергетика саласындағы интеграциялық үдерістерді ілгерілетуге назар аударылды.

Кездесу барысында тараптар алдағы ынтымақтастық бағыттары бойынша пікір алмасып, одақ елдері арасындағы энергетикалық байланыстарды нығайту үшін сындарлы диалогтың маңызын атап өтті.

Отырыс ЕАЭО елдерінің энергетикалық интеграцияны дамыту және саладағы өзара іс-қимыл тетіктерін жетілдіру жөніндегі бірлескен жұмысының кезекті кезеңіне айналды.