Алматыда халықаралық нарықта жұмыс істейтін қазақстандық шағын және орта бизнес өкілдеріне арналған «Халықаралық бизнес» жобасының жеңімпаздарын марапаттау рәсімі өтті.

Рейтингті Digital Business басылымы мен Bereke Bank бірлесіп ұйымдастырды. Алты ай бойы жоба аясында сыртқы нарықтарда жұмыс істейтін кәсіпкерлердің қызметі туралы материалдар жарияланды. Жеңімпаздарды сарапшылар кеңесі мен Digital Business оқырмандары таңдады.

Үздік шағын бизнес — Galafood

Шағын бизнес санатында Алматы облысынан шыққан Galafood компаниясы жеңіске жетті. Кәсіпорын Galamilk ешкі фермасы мен Galasoma косметика өндірісін біріктіреді.

Компания ешкі сүтінен сүт өнімдерін және сүт сарысуы негізінде косметикалық құралдар шығарады. Кәсіпорында күн сайын шамамен 1 000 қаптама сүт өнімі өндіріледі. Шикізат пен жабдық сегіз елден импортталады.

Үздік орта бизнес — World Agro Trade

Орта бизнес санатында Шымкент қаласындағы World Agro Trade компаниясы үздік деп танылды. Кәсіпорын жылыжайларды зиянкестерден биологиялық қорғау үшін түкті аралар мен пайдалы жәндіктерді өсіреді.

Ұйымдастырушылардың мәліметінше, компания Қазақстандағы жылыжайлардың биологиялық қорғау құралдарына деген қажеттілігінің шамамен 90%-ын қамтамасыз етеді. Сонымен қатар өнімдерін Ресейге, Өзбекстанға және Қырғызстанға экспорттайды.

Жеңімпаздар қандай сыйлық алды?

Екі компания да Bereke Bank-тен сыртқы экономикалық қызмет көрсету бойынша бір жылға арналған арнайы шарттарға ие болды. Бұдан бөлек, оларға Қытайдағы Кантон жәрмеңкесіне іскерлік сапарға арналған сертификаттар табысталды.

KPMG консалтингтік компаниясы финалистерге арнайы сыйлықтар ұсынды. Global Coffee компаниясы Strategy & Growth консалтингтік спринтіне қатысу мүмкіндігін алса, Telli Ondiris компаниясының басшысына бір сағаттық жеке кеңес беріледі.

Ал Digital Business барлық он финалистке компаниялары туралы PR-материалдарды тегін жариялауға арналған, құны 1,3 млн теңге болатын сертификаттар табыстады.

Рейтингке қатысу үшін барлығы 31 өтінім түскен, оның ішінде он компания финалға өтті. Жоба экспорт пен импортты дамытып, халықаралық іскерлік байланыстарды нығайтып жүрген қазақстандық кәсіпкерлерді танытуға бағытталған.

Рейтингке қатысқан барлық компанияның тарихы жобаның арнайы парақшасында жарияланған.

Дереккөз: Digital Business.